Corpus Van Reenen-Mulder (CRM14): Oorkonde E097p38501

Wj dirc van Raephorst en_ hughe van Riedwijc scepene in haerlem oirconden dat voor ons quam gheriit heren gheriits soen die zagher ende op~gaf tot enen vryen eyghen puerliken o_me gode in rechter aelmissen den heilighengeest en_ den nuwen gasthuse tote haerlem ziin helfte van zinen hielen huse metten erue legghende en_ staende twisken den kerchoue van den ouden gasthuse op die een zide en_ symon pieters soen an die ander zide . afterwaerts streckende an den huse dat heer wouter louwe nv bezeten heeft behouden katerinen zinen wiue die ander helfte van den helen huse met den erue vorscr_ daer ieghens . voort so zal kateriin dit voorseide hiele huus metten erue die bruucweer daer~of hebben also langhe als si leeft . In orconde desen brieue bezeghelt met onsen zeghelen int jaer ons heren mccc viue en_ tachtich tsondaechs na sinte pieters dach ad vincula