Corpus Van Reenen-Mulder (CRM14): Oorkonde E097p38801

Wj baertout van assendelf en_ baertout van hoesen scepenen in haerlem oerconden dat voer ons quam lambrecht ians zoen die snider ende verliede dat baernt scouten zoen behouden heeft viertich scellinghe holl_s payment siaers op ziin huus en_ op ziin erue dat baernt hem vercoft heeft legghende en_ staende in wouters strate van Rollant twisken griete van der beke an die een zide jacop van der piete an die ander zide . afterwaerts streckende an alijt van dam der weefster te betalen iairlix tot bamisse Ende dese Renten mach lambrecht oflossenen tot bamisse wanneer hi wil elc pont siaers met vijftien ponden en_ metten Renten payments vorsc_ thoeftghelt te~zamen metten Renten : In oirconde desen brieue bezeghelt met ons_ zeghelen jnt iaer ons he_n m + . ccc + . achte en_ tachtich op den zesten dach in maerte