Corpus Van Reenen-Mulder (CRM14): Oorkonde E097p39803

Wij aernt Jan en_ willem van assendelf Jans soen Scepene in h_lem Oirconden dat voir ons quam dirc ysbrants soen die pelser Ende gheliede dat hi vercoft heeft tot enen vrien eyghen den gasthuys~meesters tot des nuwe gasthuys behoef tote harlem twintich scellinghe holl_s payment siaers op ziin huys metten erue dair hi nv ter tiit In woent legghende en_ staende In die cleyne houtstrate twisken hughe willem gheriits soens soen an die ene zide gheriit symons soen an die ander zide afterwaerts streckende an goede zibrant Jaerlix te betalen tot bamisse Ende verliede al betaelt den lesten pe_ninc metten eersten En_ heeft se den gasthuys~meesters tot des nv gasthuys behoef voirscr_ gheloeft te waren als men vrie rente_ binnen der vrihede van h_lem sculdich is te waren In Oirconde desen brieue beseghelt met ons_ seghelen jnt jaer ons he_n m ccc achte en_ tneghentich sdonredaechs na ons_ vrouwen dach annu_ciacio