Corpus Van Reenen-Mulder (CRM14): Oorkonde E109p35101

Wj . jacob gherits soen en_ heynric jans soen / scepene in aemstelredamme orconden en_ kennen dat quam voer ons adaem die zael en_ gaf daer tot ene_ vrien eyghen / gherit bancman . + twe . scepene~brieve enen sprekende op symon ruusschen soen van . twe + . en_ viertich . ponden en_ . tien . scellinghe holl_s die adaem voer symon ghelouet hadde ment claes ments soen voert ene_ anderen brief sprekende dat adaem den zalen gheeyghent is met allen rechte / die helfte van + den erue en_ huse dat gheheten is haren roemers zate also alst symon ruusschen soen legghende hadde tusschen albrecht vechters soens erue op die een zide en_ diric gherit soens erue op die ander zide alse voer die twe + . en_ viertich . pont en_ tien . scellinghe holl_s ? die pande den derden pen_ing beter voert ghelouede adaem gheride voers_ dat halue ? voerghenoemt iaer en_ dach te waren als + men erue en_ eyghen sculdich is te waren en_ waer dat gherit daer enighen scade bi leede iofte hinder dien soude hem adaem op~rechten en_ verbeteren . jn orconde desen brieue bezeghelt mit onsen zeghelen Ghegheue_ in + den jare ons he_n mccc + . een + . en_ vijftich . des donresdaghes na sente victoers dach .