Corpus Van Reenen-Mulder (CRM14): Oorkonde E109p37501

Wj . Robb_t enghelbrechts soen en_ meynaert die witte ians soen scepene in Aemstelredamme orconden en_ kennen dat voer ons quam Jan lisen soen en_ gaf peter heynric symans soen dat huus en_ erue dat gheleghen is opten middeldamme tvisschen jacop meynaerts erue optie een zide en_ hoessche piet_s soens erue optie ander zide In al zulken manieren en_ voirwaerden alsoe alse hijt ghehuert hadde jeghens vecht_ heynen soen en_ ayman abbe piet_s soen In allen sciin alse die brief daer of inhout daer die huere mede ghemaket wart wilken brief voers_ dat hi heynric voers_ daer of ouer~ghegheuen heeft In orconde desen brieue beseghelt mit onsen seghelen ghegheuen op sinte odulfs auont jnt iaer ons he_n mccc viue en_ tseuentich