Corpus Van Reenen-Mulder (CRM14): Oorkonde E109p38404

Wj ysebrant coster en_ pieter jacobs zoen Scepene in Aemstelredamme orconden en_ kenne_ dat voer ons quam diric willem hoenmans zoen en_ gheliede dat hi ghepacht heeft tot ene_ eweliken pacht jeghens jacob roelofs zoen . Melijs claes zoen en_ heyneman willems zoen oudermans van sinte nyclaes ghilde . een half erue daert theel erue of is tvintich voete breet gheleghen an + den ouden burchwal tusschen jan ruusschen erue op die zuut~zide en_ jan teten zoens erue op die noert~zide streckende van + den jnnerste_ kant van + den burchwal . vijf roeden lanc alle iare om ene_ ouden vrancrijcschen scilt goet van goude en_ zuaer van ghewichte of ander payement alsoe goet Te + betalen jaerlix desen voers_ pacht die een helfte te meye en_ die ander helfte te hilighemisse voert so zel een ganc bliuen legghen op die noert~zide van + den erue voers_ an jan teten zoens erue . zes voete breet . en_ diric voers_ zel houden maken en_ verwaren die strate en_ den burchwal voer sinen huse alsoe breet als sijn erue is tot ewighen daghen op sinen cost . jn orconde desen brieue bezeghelt mit onsen zeghelen Ghegheve_ des woensdaghes na sinte marcus dach ewangeliste . + jnt jaer ons he_n dusent + / drie hondert + . vier en_ tachtich .