Corpus Van Reenen-Mulder (CRM14): Oorkonde E109p38605

Wj Jacob ruusche claes zoen . ende florens willems zoen . Scepene in Amstelredamme orconden en_ kennen dat voer ons quam . heynric Dirc heynrics zoen . en_ gheliede dat hi ghepacht heeft tot enen eweliken pacht ieghens piet_ jacobs zoen een erue twijntich voete breet gheleghen in piet_ jacobs zoens steghe twisschen ghisekijns rechtuuts erue op die oest~syde . en_ nyese coppijns erue op die west~zyde streckende van der haluer strate tot ? egbrechts erue toe alle jare om eenen ouden vrancrijcschen scilt en_ om een quartier van enen ouden vrancrijcschen scilt goet van goude ende zwaer van ghewichte of ander payment alsoe goet vryes ghelts en_ sonder enigherhande ofbrec te betalen desen voers_ pacht jaerlix die een helfte te meye en_ die ander helfte te heylichmisse Voert sel heynric voers_ die halue strate voer syn erue voerseyt houden en_ maken gheliken sinen bueren . en_ soe wat cost op den burchwal coemt tenden den erue voers_ daer sel heynric voerseyt of ghelden ghelike sinen bueren in der steghe voers_ na der brede van sinen erue voerseyt . Jn orconde desen brieue beseghelt mit onsen seghelen . Ghegheuen op sinte lossien auont / + Jnt Jaer ons he_n . m . + ccc . + ses en_ tachtich