Corpus Van Reenen-Mulder (CRM14): Oorkonde E109p38702

Wj Godeuaert jans zoen en_ Claes heynrics zoen Scepene in aemstelredamme orconden en_ kennen dat voer ons quamen Griete die jan bodwnres wijf was mit willem hore_ zoen horen mombaer en_ willem voers_ van sijns zelues wegen . en_ ghelieden dat si verhuert hebben jacob roelofs zoen husinghe en_ erue gheleghen in die kercstrate tvisschen nyese lanen en_ aernt hoers zoens erue op die een zide en_ harman jans zoens en_ Claes broedertgijns zoens erue op die ander zide streckende van + der straten toter grafte toe toten eweliken pachte jaerlix om . viertien oude vrancrijcsche scilde goet van goude en_ zwaer van ghewichte jof ander payment also goet vryes ghelts en_ sonder enigherhande ofbrec wtghezet des her_n tijns Te betalen alle jare dese huere voers_ die een helfte te meye en_ die ander helfte te hilighemisse . en_ jacob voers_ die zel betale_ hier boue_ . een pont holl_s jaerlixer renten dat willem doese opten huse en_ erue voers_ staende heeft jn orconde desen brieue bezeghelt mit onsen zeghele_ Ghegheve_ op + te_ lesten dach der maent van maerte jnt jaer ons he_n dusent drie hondert . + zeue_ en_ tachtich