Corpus Van Reenen-Mulder (CRM14): Oorkonde E109p38905

Wj dyrc zael iacobs zoen ende pieter gherrits zoen Scepene in aemstelredamme orkonden en_ kennen dat voer ons quamen . ziborch dyrc coeps dochter wilborch meynaert cupers dochter . lobbe grebbe_ en_ gheertruut splinters dochter en_ ghelieden seyden en_ tughenden dat si vier principael voers_ die husinghe eerst deden tymmeren op pieter yacops zoens erue . dat heynric jans zoen gherijt die brune jans zoen En_ jan heynrics zoen van den damme ghepacht hebben tot der willigher armer joncfrouwen behoef Ende dese vier voers_ ghelieden dat si deze husinghe ghetymmert hebben En_ hoer goet daer thoe ghegheuen hebben dat hem an~ghecomen is van hoeren ouderen en_ vrienden En_ dat lobbe grebben en_ gheertruut splinters dochter dat meeste deel van den goede daer toe ghegheuen hebben daer dese husinghe mede ghetymmert is En_ die voers_ vier ghelieden seyden en_ tugheden dat si monbaers en_ vogheden ghecoren hebben voer him en_ voer hoer nacomelinghe die tot ewighen daghen in der voerscr_ husinghe gheherberghet zullen wesen en_ nu gheherberghet siin . haer ghisebrecht douwe . heynric jans zoen willam brune Roelofs zoen Ende willam ghisebrechts zoen In hoerre stede te wesen Ende si ghauen~ouer wes goet dat si daer an gheleyt mochten hebbe_ En_ so wes recht dat si daer an hebben mochten alse willighe arme joncfrouwen en_ weduwen tot der willigher armer Joncfrouwen en_ weduwen behoef die men in der husinghe voers_ herberghet Item soe en sel nyemant in den voerscr_ husinghe mit der wone comen noch gheherberghet werden ten si bi den monbaers voers_ en_ den zusteren die nv in den huse woenen Iof namaels woenen zullen . Item waer yemant die in den huse voers_ woende die him qualike regierde Jof onvredelic waer mit kyuen Iof mit eyghenscap hoer~seluen te wercken Jof hoers selues cost hebbe_ Jof onneerbaerlike wanderinghe hadde Jof nachts wt te slapen Jof wt teten Jof alte ghesierde cleder te draghe_ Jof costelike lecker spise woude ghereet hebben sonder noot van ziecten Jof dat si niet wercken en wouden mit handen Jof ander wercke die hem en_ hoeren zusteren nootorstich siin een yeghelic na mate siinre craften en_ cunsticheyt die him die zusteren doen heten er die sorghe beuolen wart van him allen Jof waer yemant die enighe valsche vryheyt oeffende Iof valsche artikelen . Jof bedroghen scouwinghe Jof gheuensede ledicheyt worde yemant in desen voers_ punten vermaent dat si hem beteren ? en_ en willen sijs niet doen Soe moghen se die monbaers en_ die zusteren wt ten huse doen al en wouden si daer niet wt wesen voert om wat zaken dat die ghemeen zusteren tughen mit den monbaers dat yema_t nutte wt den huse ghedaen waer Jof die meerre helfte van den zusteren mit den monbaers die moghen si daer wt doen Item die begheert te wonen in een voers_ huse die sel men te~voren segghen dese voers_ punten en_ goede ander ghewoente_ van den huse die ? dienen moghen die si doen moeten op~dat si weten moghen wat si doen willen en_ hem naemaels niet te beclaghen en hebben dat sijs niet en wisten en_ men selse alle hergherghen alse willighe arme menschen so_der enighe coepe ? ? ? eyghen Item niemant en sel daer steden copen Jof uercopen moghen Item nyemant en sel daer eyghenscap an den huse hebben als tot sinen persoen alle sellen si gheherberghede menschen wesen nochtans _ + sel daer nyemant In~wonende bliuen noch mit der wone comen ten si bi den monbaers en_ bi + den zusteren wille Jof bi den meerre deel van den zusteren en_ bi + den monbaers Item quame_ ioncfrouwen Jof weduwen die in + den huse begheerde_ te wonen - ? ? mit der woene van + den monbaers en_ zusteren waer dat si enich ding daer brochten het waer ghelt cleynoet Jof huusraed dat si den zusteren gauen doer gods wille voer den zusteren en_ voer eneghe twie van den monbaers dat ? die zusteren ? ? ? en_ verslitent mit malc~ander soe waer sijs te doen hebben al waer oec dat si naemaels wten huse ghinghe mit hoer selues wille jof om die voers_ ? daer wt + ghedaen ? dat si den zusteren ghegheuen hadde ? ? wille dat en mochten si + den zusteren niet weder eyschen noch nyemant van hoers weghen Item ware dat enich twiste gheviel onder die zustere_ van enighen zaken daer si niet eens waren het waer van innemen Jof wt te setten eenighen personen Jof van + der uersettinghe hoerre maecten Jof van eenighen zaken waer + of dat wesen mochte daer twiste Jof twedracht of come_ mochte dat sel + men an die monbaers bringhen en_ die sellen die zaken vroedeliken onderzoeken van den zusteren en_ daer die gheloeflicsten personen dat meeste deel tughen beste wesen Jof recht te hebbe_ daer moghen si vroedelike_ in + der zaken doen na hoeren kennen mit den meerre deel uan den zusteren en_ die gheloeflicste Item soe sel + men tot ewighen daghen als een van + den monbaers steruet eenen anderen kyesen in siin stede mit den monbaers en_ mitten meeste deel van den zusteren Voert soe quamen uoer ons die Joncfrouwen en_ weduwen die nv ter tiit In den voers_ huse woenachtig siin alse ziborch dirc ? dochter . wilborch meynaert cupers dochter . lobbe grobben gheertruut splinters dochter voers_ . aue jacops dochter . fie dirc raets dochter . jacop imen lijt aelberts dochter . lisebet claes dochter Griete soenaerts wiborch claes dochter . Griete jacops dochter . lutghert gherijts dochter . Griete gherijts dochter . hildegont dyrcs dochter alijt willams dochter aue heynen dochter Nyese volcwiins dochter alijt witten Griete Symans dochter loudu claes dochter . brechte ruusschen dochter Corstine dyrcs dochter lisebet jans dochter wt waterlant . lisebet jan pilgrams soens dochter . lisebet outghers en_ duue hoer dochter beatris dircs dochter Clamense ysebrants dochter lisebet zibouts dochter lisebet jacops dochter katrine pieters dochter meen dyrcs dochter Diedu jans dochter lobbe wouters dochter hildegont pieter abben dochter Katrine aernts dochter . lisebet gherijts dochter . Fye allaerts Griete wt waterlant Ermegaert bernaerts dochter Ghertruut van naerden . menv van hoerne clare van delf Griete van alcmaer Alijt dirc vrancken zoens En_ ghelieden seyden en_ tugheden dat si in den voers_ huse gheherberghet siin In allen manieren en_ punten alse dese brief inhout En_ ghauen~over en_ scouden quijt alle dat si daer ghebrocht hadden den zusteren tot den huse die in den huse wonende bliuen En_ coren die monbaers voers_ In allen sciin als voers_ is alse dese brief inhout En_ dat goet ny_mermeer weder te eysschen noch nyemant van hoerre weghe_ En_ gheloueden alle dese punten voers_ vaste en_ ghestade te houden En_ want alle dese voerscr_ joncfrouwen en_ weduwen ons scepene voers_ ghebede_ hebbe_ dese voerwaerden ouer him te beseghelen Soe hebben wi scepene voerscr_ desen brief bezeghelt mit onsen zeghelen tot eenen orcond Ghegheuen op den eersten dach van aprille Int Jaer ons heren dusent drie + hondert neghen en_ tachtentich