Corpus Van Reenen-Mulder (CRM14): Oorkonde E109p38906

Wj Scout Scepene Ende Rade der stede van Aemsterdam . maken kenlic allen lieden . die dese lettere sullen sien dat wj om orbaer . profijt ende nutscap der armer beghinen in amsterdam . Ende oec om alrehande scade . last . ende hijnder te voerhoeden . die namaels ghescien mochten binnen horen houe ende tymmeringhe . Consenteert . ghesterct ende gheordineert hebben aldustanighen gheset als hier na ghescreuen staet . Dat is . waer dat enighe beghine . die nv si of hier~namaels opten beghijnhoue woende . husinghe cofte of tymmerde . die en soude die husinghe in horen leuen . noch hoer erfname na hoerre doet vercoepen : noch vervreemden yenighe_ mensche buten den houe . noch binnen . ten ware bi oerloue ende consent der ghemeenre beghinen binnen den houe voerscr_ Ende om~dat wj willen dat dit stade ende vast ghehouden warde . Soe hebben wj desen brief biseghelt mitter stede seghel voerscr_ . ghegheuen op sinte marcus dach ewangeliste Int Jaer ons he_n . m + . ccc neghen ende Tachtich