Corpus Van Reenen-Mulder (CRM14): Oorkonde E109p39001

Wj . dirc zael jacops soen en_ jacop ghisebrecht soen scepene in aemstelredamme / orconden en_ kennen . dat voer ons quamen die goedshuus~beraders / van + der kercke va_ aemstelredam_e alse meyster willam / willams soen / dirc piil / Godevaert hoesschen soen / albert ghiistgins soen en_ jan willams soen en_ ghauen eenen vrien eyghendoem . bi goetdoncken den gherechte van + der stede voers_ . den ouermans van + den ghilde / daer die sniders sceerres en_ die coemans in hoeren alse tot des ghilden behoef voers_ / van een derndeel van eenen ouden vrancriicschen scilde . jaerlixse renten / die wilke staen zullen totten eeweliken pachte op dat huus en_ erue gheleghen in die kerckstrate tvisschen jan adams soens erue op die een zide en_ die strate die men ghaet op + die oude brugghe op die ander zide . streckende van + der straten alse verre alse doede roeterts soens erue daer gheleghen is . doe hi in sinen lesten liue was / wilke doede voers_ dese voerscr_ renten voers_ besprac der kercken voers_ vries ghelts en_ sonder eenigherhande ofbrec / alse die goedshuus~beraders voers_ voer ons ghetughet hebben / te bitalen alle jaere dese voersc_uen renten tot meye / en_ si ghelieden daer of vol en_ al betaelt den lesten penninc mitten eersten voert soe gheloueden die goedshuus~beraders voers_ bi goetdoncken den gherechte voers_ den ouermans van + den ghilde voers_ tot des ghilden behoef voers_ dese voersc_ue_ renten / te waren jaer en_ dach alse men erue en_ eyghen scoudich is . te waren en_ alle oude brieue of + te nemen . jn orconde desen brieue beseghelt / mit onsen seghelen Ghegheuen des woensdaghes / na den heylighen dertienden dach . jnt jaer ons he_n . mccc en_ tneghentich