Corpus Van Reenen-Mulder (CRM14): Oorkonde E109p39201

Wi . Ricout ians zoen en_ symon die zael iacops zoen . scepene in aemstelredamme orconden en_ kennen . dat voer ons quam . gheertruut die ian symon didden zoens wijf was . mit ian ians zoen . hoeren zoen . hoeren monbaer daer si mit rechte aen quam . en_ mit hoeren vier vierendelen . alse men + se naeste ghecrighen mochte . alse Ruusch aernts zoen . ruusch claes zoen . dirc allert . en_ willam reyners zoen . en_ ghaf eenen vrien eyghendoem . bi goetdoncken der Raed van + der stede voers_ . albert dier . ians zoen . van + den achtendeel . van vijf morghen lants tvie hondert myn . die gheleghen zijn bi + der smaelre weesp . twisken luuduwen en_ hoerre kinder lande . die ian witte ghisen zoens wijf was . op die een zide . en_ lambert scoutgijns zoens lande op die ander zide . Ende van + den achtendeel . van drie morghen lants . gheleghen tot muden . in ian diuels lande . In allen schijn als si dit voerscr_ lant . bi + der smaelre weesp en_ tot muden legghende heeft . En_ ghelieder of voldaen en_ betaelt den lesten penninc mitten eersten . Voert zoe gheloefde gheertruut voerscr_ . mit hoers monbaers hant voers_ . bi consente van hoeren vier vierendelen voerghenoemt . albert dier voers_ . Dit voerzeyde lant . vri te waeren iaer en_ dach . alse men erue en_ eyghen scoudich is te waeren . en_ alle oude brieue of te nemen . wtghezet die lijftochts brieue . die iacop van + den barghe . opten voerghenoemden lande sprekende heeft . In orconde desen brieue bezeghelt mit onsen zeghelen . ghegheuen opten neghenden dach der maent van aprille Int iaer ons hee_n . dusent + . drie + hondert + . tvie en_ tneghentich .