Corpus Van Reenen-Mulder (CRM14): Oorkonde E109p39202

Wi . Ricout ians zoen en_ heyn noert . scepene in aemstelredamme . orconden en_ kennen . + dat voer ons quam . Jan claes zoen . en_ gheliede dat hi ghehuurt heeft ieghens pieter iacops zoen . eenen tvune gheleghen twisken der zwesteren hof en_ der aemstel . tvie roeden breet . en_ achte roeden lanc . behaluen den vaersloet en_ den wech die voer den voerscr_ tvun leyt . totten eeweliken pachte . jaerlixe om twalof groete . eenen goeden ouden vrancrijcschen scilt gherekent voer viertich . groet jof ander payment dat alsoe goet is . vries ghelts en_ zonder eenigherhande of~brec . te betalen alle iare dese voerscr_ huure opten meye~dach . Voert zoe zel ian voers_ den wech en_ den sloet . die voer den voerscr_ tvune leyt . houden en_ maken ghelike zinen bueren . alse~dat een yghelic die in pieter iacops zoens lande bruucweer heeft . den voerzeyden wech en_ sloet langhes . orbae_n . gaen . en_ varen mach mit eenre gheladenre scute . Voert zoe gheliede pieter voerscr_ dat ian voers_ zel hebben eenen vrien ouerganc . van + der zweste_n brugghe die ouer die nuwe grafte leyt . zuutwaert den wech langhes te gaen en_ te bruken . die twisken der nuwer graften leyt en_ der zwesteren hof . totten tvune toe voers_ Voert zoe gheloefde pieter voers_ dattie sloet die in + der nuwer grafte gaet . en_ gheleghen is twisken baernt die stilganmakers lande op die een zide . en_ der zweste_n wech . op die ander zide . open zel bliuen . eenen ygheliken zijn not daer duer te voeren . En_ voert zoe zel ian voers_ helpen houden en_ maken der zweste_n brugghe die ouer die nuwe grafte leyt . alsoe verre alse hi daer toe vermaent wart . ghelike zinen bueren die in + den zeluen lande gheleghen zijn . In orconde desen brieue bezeghelt mit onsen zeghelen . ghegheuen opten zesten dach der maent van meye . Jnt iaer ons hee_n . dusent + . drie + hondert + . tvie en_ tneghentich .