Corpus Van Reenen-Mulder (CRM14): Oorkonde E109p39501

Wij . Coppe louwe en_ heynric hoec dirx zoen scepene in amestelredamme . oirconden en_ kennen . dat voir ons quam Pieter iacobs zoen en_ gheliede dat hi verhuurt heeft Dirc bankeman . enen tv˚ne . twie roeden breet . gheleghen in pieter iacobs zoens nesse bi der amestel . vp die oestzide van + den tv˚ne die Jan claes zoen in pachte heeft . Voir van + den vairsloete streckende tot vrederic gherijts zoens viuersloete toe . Tot den eweliken pachte jairlixe om dertien en_ enen haluen hollanse grote . Enen g˚eden gouden hollansen scilt . die n˚ leste is ghesleghen na der ordinancie als onze lieue ghed˚chte he_ van holl_nd mit zinen Steden ouerdraghen was . voir viertich grote gherekent . Iofte payment dat alzo g˚et is . vries ghelts en_ zonder enich of~brec . Te betalene alle iare deze voirscr_ h˚ure vp den meye~dach . In dezer manieren en_ voirwairden . dat dirc bankeman den wech en_ den sloete . die voir dezen voirscr_ tv˚ne leyt . houden en_ maken zal ghelijc zinen b˚eren . vp~dat een yghelic die in pieter iacobs zoens lande br˚ucweer heeft . den voirs_ wech en_ sloete . langhes oirbaren . gaen . en_ varen mach mit eenre gheladenre sc˚te . Voirt dat dirc voirnoemt zal helpen houden en_ maken . der zusteren brugghe die ouer die n˚we grafte leyt . alzo varre als hi dair toe wart vermaent ghelijc zinen b˚eren die in + den zeluen lande zijn gheleghen . Voirt zo gheliede pieter voirs_ dat dirc voirscr_ zal hebben enen vrien ouerganc van + der zuste_n brugghe die ouer die n˚we grafte leyt tot den tv˚ne toe voirscr_ . Den wech die gheleghen is twisken der zuste_n hof en_ der n˚wer grafte . z˚ytwairt langhes te gaen en_ te br˚ken . En_ dat die sloete die in der n˚wer grafte gaet en_ gheleghen is twisken baernt die stillegancmakers lande aen die ene zide . en_ der zuste_n wech vp die ander zide . zal open bliuen enen ygheliken zijn not dair d˚er te voeren . In oirconde dezen brieue bezeghelt mit onzen zeghelen . ghegheuen vp den vijftienden dach in Januario . Int iare ons he_n . m + . ccc + . viue ende tneghentich , + .