Corpus Van Reenen-Mulder (CRM14): Oorkonde E109p39503

Wij Dirc Symonszoen Scoute . Willem ians zoen en_ Iacob adams zoen scepene in amestelredamme . Oirconden en_ kennen . dat voir ons quam . In tgherechte Ian claes zoen en_ sprac~an mit rechte heynric ians zoen en_ dinghede dat hi hadde dat meerredeel van enen tv˚ne gheleghen vp die wintmolenzide . twisken Ian vyt + ten carkers tv˚ne aen die ene zide en_ Coppe ruusschen erue vp die ander zide . streckende van Ian claes zoens erue tot der n˚wer grafte toe en_ dat heynric voirs_ dair of hadde dat minredeel wilc deel dat was een derdendeel . Dat hi dat hebben zoude te cope Iof te h˚yre tot tsgherechts zegghen van + der stede voirs_ . Twilke wart ghewijst mit rechte en_ mit vonnisse dattet Ian claes zoen zoude hebben tot tsgherechts zegghen voirscr_ Dair dat gherechte een zegghen of heeft ghezeyt . In dezer manieren en_ voirwairde dat die ghehele tv˚ne is ghescat en_ ghezet voir achtien g˚ede goudene hollanse scilden die n˚ lest zijn ghesleghen na der ordinancie als onze lieue ghed˚chte he_ van holl_nd mit zinen steden was ouerdraghen . Iofte payment dat alzo g˚et is , + . Dair dat derdendeel van den voirscr_ tv˚ne of beloept . zes der scilden voirs_ Te betalene vp die drie landdaghe naist~comende . Iofte van elke twintich penninghe Iairlixe tot den ewelike_ pachte na inhoudt der wilkoer te gheuene te rente enen penninc . vries ghelts en_ zonder enigherhande ofbrec all~dair heynric voirnoemt Iairlixe tot den eweliken pachte coes die rente te hebbene . Wilke renten van heynrix deel voirs_ dat beloepen . tvierendeel en_ een twintichsten deel van den voirnoemden hollansen scilt . Iofte payment dat alzo g˚et is . Te betalene alle iare dese voirscr_ renten tot heylighemisse . In oirconde dezen brieue bezeghelt mit onzen zeghelen . ghegeuen vp den twaloften dach in maerte . Int iare ons he_n duzent + . drie + hondert viue ende tneghentich .