Corpus Van Reenen-Mulder (CRM14): Oorkonde E109p39506

Wij . Claes die zale jacobs zoen en_ florens willems zoen Scepene in Amestelredam_e / oirconden en_ kenne_ / dat voir Ons quam . Aue van + der zipe / mit Reyner gherijts zoen hoiren ghecoren monbair dair zij mit rechte ane quam . en_ mit hoiren vier vierendelen als men ze naiste conde ghecrigen . Ende clagheden den Scoute en_ den ghemeynen gherechte / dat Jan die graue hoir man In tiden langhe voirlede_ hoir ontganghen is / en_ hairs g˚ets alzo vele ontuerrede en_ ondroech / dat zij niet meer en heeft behouden dan een h˚ys ende erue . ghelegen In + der voghelenzanc / Dair bi gheeruet zijn / gherijt claes zoen an die ene zide / ende willem symons zoen vp die ander zide . Ende van armoeden In t + gasth˚ys van sinte pieter In ganzoirde is ghegaen . want zij hair noetdr˚fte niet en hadde / Ende want die Rade en_ tghemeyne gherechte van der Stede voirs_ kenneden dat hoir man voirn_ hoir In zulker ellende ende armoede_ ghelijc voirscr_ staet heeft ghelaten . So gaf zij mit hairs monbairs hant / bi wille en_ g˚etdunken der Rade en_ tsgherechts . ende hoirre vier vierendelen voirs_ enen vrien eyghendoem . Den ghasth˚ysmeysters van + den ghasthuze voirscr_ Tot des zeluen ghasth˚ys beh˚ef / Van + den voirscr_ huze en_ erue In alzulken pachte als zijt dair hadde . Ende die ghasth˚ysmeyst_s ghelouede_ hair weder hair leuen hair noetdr˚fte In dat ghasth˚ys te gheuene . In oirconde dezen brieue bezeghelt mit Onzen zeghelen . ghegeuen vp den neghen en_ twintichsten dach in nouember . Int iare ons he_n . duzent drie + hondert viue ende tneghentich , + .