Corpus Van Reenen-Mulder (CRM14): Oorkonde E109p39604

Wij Symon ruusch en_ dyrc melijs Scepene In Aemestelredam_ oirconden en_ ke_nen dat voir ons quam meynaert hughe_ zoen van alkemer . en_ gheliede alle die voirwairden die hier na geschreuen staen . Alze dat die Canonissen reguliers binnen die vrihede van der stede voirn_ ghelegen . zullen hebben die br˚ucweer van dien lande dat hi legghende heeft binnen den ban van graft gheheten die bosch die claes gherijt bertouts zoen placht toe te behoren ghelegen bi den cocsloet en_ voert van alsoe veel landes als meynaert voerscr_ an~bestoruen is van siinre zwegher katherinen Claes gherijt b_rtouts zoens wijf was gheleghen in outdorper lant en_ oec in claes gherijt b_touts zoens venne in nordenne gheheten tyenkoeweyde . In des_ manieren dat zij dit voirscr_ lant bruken zullen also langhe als Griete meynaert hughen zoens dochter In haere cloester en_ hove woenachtich bliuet En_ wairt dat Griete voirs_ In den voirscr_ cloester en_ hove sturue . en_ ofliuich worde Soe soude dit voirs_ lant den canonissen voirn_ . tot enen vrien eyghen bliuen tot ewighen daghen mar wair dat zake dat Griete voirs_ mit hoirre woenstat . vut den voirscr_ cloester en_ houe mitter woene voere . Soe zoude Griete voirs_ dit voirscr_ lant . vri behouden . hoiren erfnamen te eruen en_ die Canonissen voir_ en zouden dan dair niet an hebben In oirconde dezen brieue bezeghelt mit onzen zeghelen ghegheuen vp den zeu_tienden dach in meye Int jare ons heren duzent drie + hondert + . ses en_ tneghentigh