Corpus Van Reenen-Mulder (CRM14): Oorkonde E109p39901

Wij . willem noirt willems zoen en_ vechter iacobs zoen Scepene In amestelreda_me . oirconden ende kenne_ . dat voir ons quam . Ian van dyemen euerts zoen en_ gheliede dat hi gheh˚yrt heeft Iegens pieter iacobs zoen enen tv˚ne van zesse en_ dertich viercante roeden . + ghelegen bi + den Canonissen reguliers In + den vtersten nesse vptie westzide van + den tv˚ne die Tr˚yde pelen In pachte heeft van pieter iacobs zoen . Totten eweliken pachte . Iarlixe om achtien scellinghe holl_s . enen g˚eden ouden francrixen scilt voir zesse en_ twintich scellinge en_ achte penninge holl_s gherekent . vries ghelts en_ zonder enich afbrec . Te betalene deze h˚yre alle iare tot meye . In dezer manieren en_ voirwairde_ . dat Jan van Dyemen houden en_ maken zal ghelijc zinen b˚eren den wech en_ den sloete die voir dezen voirscr_ tv˚ne leyt vp~dat een yghelic die in pieter iacob zoens lande bruucweer heeft den wech en_ den sloete voirs_ / langhes oirbaren gaen en_ varen mach mit eenre geladenre sc˚yte . Ende Ian van dyemen zal helpen houden ende maken der zuste_n brugge die ouer die n˚we grafte leyt alzo varre als hi dair toe wart vermaent ghelijc zinen b˚eren die in + den zeluen lande zijn ghelegen . Voirt zo gheliede pieter iacobszoen . dat Ian van dyemen hebben zal enen vrien ouerganc van + der zuste_n brugge die ouer die n˚we grafte leyt totten tv˚ne toe voirscr_ den wech die ghelegen is twisschen der zuste_n hof en_ der n˚wer grafte z˚ytwairt langhes te gaan en_ te bruken . Ende dat die sloete die in + der n˚wer grafte gaet en_ ghelegen is twisschen baernt die stillegancmakers lande an deene zide en_ der zuste_n wech vp dander zide . zal open bliuen een yghelic zijn not dair d˚er te vueren . In oirconde dezen brieue bezegelt mit onzen zegelen . ghegeuen vpten vier en_ twintichsten dach in Iulio . Int iare ons he_n . duzent drie + hondert neghen ende tneghentich . , .