Corpus Van Reenen-Mulder (CRM14): Oorkonde E167p32201

Allen den~ghenen die dese lett_en zellen zien of horen lesen . . Make jc kont en_ kenlike Jonfrou aechte heynen dochter van velsen dat jc machtich mire sinne en_ redene / bi minen vrien wille en_ bi minen gane en_ stane / hebbe ghegheuen en_ gheue / jn testame_te en_ in rechter aelmossen simpelike om godes willen / en_ om Salichede mire zielen . den gasthuse van leyden Alle goed en_ erue / die mi aneghecomen zijn van rechter erfnesse van Jsebrands mijns broed_s doet daer god die ziele of hebben moet Ende alle goed en_ erue roerende en_ onroerende voerseyt mi te tide ane te + uaen . . vtghenome_ husinghe en_ jmboedel alst was in sinen lesten liue / maer meester hughe mijn broeder en_ yde jsebrands wedewe zellen dese husinghe en_ jmboedel besitten onghedeelt jeghens tgasthuis alzo langhe als zi leuen / en_ na harer beyder doet sal tgasthuis nemen sine grote alset jonfrou aechten ane~bestoruen was van jsebrands haers broed_s doet voerscreuen / Jn kennesse dere dinghe zo heb jc jonfrou aechte voernoemd desen brief met mijns zelfs zeghel beseghelt / Ende omme die meerer zekerheede zo heb jc ghebeden wisen lieden en_ bescheydenen . . haren henrike spiker prouisor en_ deken van rijnland dat hi dese lett_en beseghelt heuet met Sinen zeghel . En_ den Rechter Scepenen en_ den Raedsmanne_ van leyden dat Sine beseghelt hebben met harer ghemeenre poerte~zeghel . Ende wi henric spiker voernoemd om bede jonfrou aechten zo heb ic desen brief met minen zeghel beseghelt en_ Rechter Scepene en_ raedsmanne voerseyt hebben dese lett_en met onzer poerte~zeghel beseghelt jn kennesse der ? dinghe . Ghegheuen Jnt iaer ons he_en dusent drie + hond_t en_ ? + ? + ? . . des vridaghes na Sente ? daghe jn maerte