Corpus Van Reenen-Mulder (CRM14): Oorkonde E167p34404

WJ andries hansoeten sone en_ airst gonters sone / Scepene in leyden / Maken cont allen luyden / Dat vinke andries sone voir ons quam . en_ gheliede dat hi vircoft heeft / Gheertrude beudiins weduwe van suieten / Een pont holl_ vriis ghelds siairs / op siin huys . en_ op siin erue dat beleghen heeft Ghisebrecht ghisebrecht tunebrekers sone mit sine_ huyse en_ erue an diene side . en_ katrine poys en_ hoir dochter mit horen huyse en_ erue an dander zide / En_ dese renten voirseit alle jare te + betalen tote voirscoter marcte / En_ vinke voirseit die heeft hem beliet betailt den lesten penninc mitten eyrsten van desen renten voirscreue_ / Jn oirkonde desen brieue beseghelt mit onsen seghelen / Ghegheuen jnt jair ons h_en / duysent / + drie hondert / + vier en_ viertich . des donresdaghes voir sente valentiins daghe - - -