Corpus Van Reenen-Mulder (CRM14): Oorkonde E167p34601

WJ hughe van der bregghe en_ godeuaird symons sone scepene in leyden maken cont allen luyden dat hughe phillips sone quam voir ons en_ gheliede dat hi vircoft heeft willaem willaems sone die smale hale die gheleghen js in den ambochte van soeterwoude die hi helt te liene van ve_n genephi vrouwe van zanthurste h_en jans wiif van egmonde vter wike ridders dair + men of seit voirs_ hoir liiftochte an hebben soude dair hughe toe seit dat hi beatrijs siin wiif brenghen sel voir mire vrouwen van zanthurste als si te zanthurste jof te rodenburch jof te leyden js en_ willaem hughen virmaent voir twie scepen . alse hughe en_ beatriis beyde binnen leyden sien hoir liiftochte dair of quite te scelden alse recht js En_ ombrake der vrouwen voirseit . so beloift hughe voirs_ beatrijs siin wiif te brenghen . dair hi + se van rechte scoudich js te + brenghen dese liiftochte quite te scelden alse voirscreuen js wair dat hj des niet en + dede . so beliet hi hem scoudich te wesen willaem voirscreu_ viif en_ twintich pont holl_ En_ hughe voirs_ die beliet hem van desen voirghenoemden lande betailt den lesten penninc mitten eyrsten Jn oirkonde desen brieue beseghelt mit onsen seghelen Ghegheuen jnt jair ons h_en duysent drie hondert ses en_ viertich des manendaghes na sente gregorijs daghe - -