Corpus Van Reenen-Mulder (CRM14): Oorkonde E167p34802

Wj philips jan oems soen / En_ hughe pieters soen / Scepene jn Leyden / oirkonden en_ kennen dat Aernd die potter vercoft heft / h_en Gherarde pieters soen / tien scellinghe holl_ siaers vryes ghelds alle jare te versien vp die drie v_endel van den huyze en_ erue / dat hi ghemeen heft mid poirter den gorter mid enen v_endel / datter poirter voirseyt an heft / Wilc huys ende Erue Gheleghen is upten hoec Langhes der weuer~steghe / voir soe gaet die grote strate / die ander side heft beleghen will_ duyue mid sinen huyze en_ erue / Ende after streckende an jans weuers Erue / te betalen die Eerste Rente voirseyt tote voirscotenre + marct naest~com_de / en_ alsoe voert van jare te jare jn sulken paymente te betalen als die h_e ontfaet van sinen Renten / En_ Aernd voirscreuen heft him belyet al vol betaelt den Lesten penninc mitten Eersten / Jn Oirkonde desen brieue bezeghelt mid onsen zeghelen / Ghegheuen jnt jair Ons h_en / dusend / + drie hondert Acht en_ viertich vp sente ponssiaens dach . . .