Corpus Van Reenen-Mulder (CRM14): Oorkonde E167p34903

Allen den~ghenen die desen brief sullen sien of horen lesen make jc kont ende kenlijc dirc van den bosche scoute in zoeterwoude dat voer mi en_ voer die ghemene buere quam barteraet gherets mit dirc gherets soen haren soen haren coren voecht en_ beliede dat si vercoft heeft haren pieter den hoeschen priester tien scellinghe holl_ tsiaers ewelike staende alsulc ghelt als die here doet creyeren in sinen marcten op . viif morghen lands die gheleghen sien in den ambocht van zoet_woude welc lant beleghen heeft an die oest~side dirc gherets soen voerscreuen mit sinen broedere_ en_ susteren mit eyghen En_ jacob die brouwer an die west~side mit eyghen En_ dat noert~ende wt~streckende in + den uliet . en_ dat suud~ende in die wateringhe welc lant voers_ vri is van allen onghelde wt~ghenomen viif scellinghe tsiaers die er op heeft die heylighe~gheest te voerscoten En_ dese voers_ renten sel + men jaerlix betalen te valkenburgher marct binnen der betalinghe En_ waer dat zake dat dese voers_ renten niet betaelt en worden alst voers_ is . so soude haer pieter voers_ of yement van siin nacomelinghe an~tasten twe morghen lands van desen voers_ lande ouer siin vri eyghen voer dese voers_ renten En_ waer dat zake dat haer pieter of siin nacomelinghe dese voers_ renten vercopen woude . so mochte barteraet voers_ of haer erfnamen losenen dese voers_ renten om dien penninc die si waerdich siin voer een ander Jn kennesse der waerheyde so heb ic desen brief bezeghelt mit minen zeghele Ghegheuen int iaer ons heren dusent drie + hondert neghen ende viertich des dinxdaghes na onser vrouwen daghe te midden~oest