Corpus Van Reenen-Mulder (CRM14): Oorkonde E167p35805

WJ phillips Jan oems soen en_ Jan duker Scepene in leyden Oirkonden en_ kennen dat voir ons quam willaem Jans mans soen ende gheliede dat hi ghegheuen heuet Jannen sinen soen in puurliken aelmissen aldusdanich goet als hier na bescreuen staet / Jn den eerste_ een campe lands die gheleghen is in den ambocht van zoeterwoude houdende drie morghen luttel min jof meer en_ beleghen heuet hughe badzeleder an die noertzide en_ die capelriecamp an die zuytzide en_ nv ter wilen ghelt in hure ses pont holl_s siairs / Jtem in de_ seluen ambocht een campe lands op meerburgher weterinc die gheheten is poskiaens~camp houdende vier morghen luttel min jof meer Streckende van pieter wouters soens land op den weterinc voersc_ Jtem viertich scell_ hollansche siairs vriis ghelts te virsiene op tien honde lands luttel meer jof mi_ die gheleghen sien in den ambocht van noertich en_ beleghen heuet wout_ willaem coudenaers soen an die zuytoestzide en_ die abbedisse van der lede an die noertwest~zide Streckende van den madesloet an de_ wandelacker / Jtem noch een pont siairs binnen leyden op reynburch goeskiaens huse en_ erue op den rine dat beleghen heuet aliit wildiken an die ene zide en_ claes rogghekiaens an die ander zide mit horen husen en_ eruen / Jtem in die perrochie van hogheland een pont holl_s siairs op claes masts huse en_ erue dat beleghen heuet wolbrant an die ene zide en_ dircs van oestgheests kinderen mit horen husen en_ eruen an die ander zide / van wilken goede en_ renten voersc_ willaem weisert op~droech vrielic mit dezen brieue Jannen sinen sone / den rechten eyghendom / alle renten / oerbaer ende nutscip diere of come_ mach van desen daghe werwaert te ziere behoef Jaerlix die voersc_ renten vri op te boeren en_ zinen vrien wille daer mede te doen . Jn kennesse deser waerheit So hebben wi dezen brieue beseghelt mit onzen seghelen ghescreuen Jnt jair ons heren dusent drie + hondert achte en_ vijftich des vridaghes na vastenauond - - -