Corpus Van Reenen-Mulder (CRM14): Oorkonde E167p35808

WJ ysebrand Roetairds soen ende jan duker Scepen in leyden doen cond allen luden dat wi dair bi ende ouer waren alse Scepen dair die rechter pande an dirc dirx soens huys ende erue dat gheleghen is op der volres~graft ende beleghen heft an die ene zide claes louwerijs zoen en_ an dander zide beudetkiaen die timmerman mit horen husen ende eruen / costijn van der bregghe ende airnde van der heyde Rentemeest_en nu + ter + tijt der Scepenen van leyden toit der Scepenen behoef achtien scell_ holl_s van boeten der Scepenen ende twie scell_ van boeten des scouten den derden pe_ning meer van beyden dat loept dertich scell_ holl_s van elken punde twie scell_ tsiairs . dat loipt drie scell_ holl_s tsiairs Te + betalen alre jare toit alre heyligher misse wilke Renten die Recht_ gheeyghent ende quite ghescouden heft den Rentmeest_en voirnoemt . Ende voirt so hebbe_ costijn ende airnd voirs_ desen Renten voirt vircoft h_en nyclaes jacobs soen priester . En_ hughe ghiben neue scoute . costijn van der bregghe jan duker philips jans soen ysebrand Roetairds soen pieter van hairlem airnd van der heyde . willaem bort ende ghered heerman Scepen jan van braband ende ghered Rijswit Raedslude hebbe_ belouet mit ghezamender hand ende elc voir al desen Renten voirnoemt te + waren h_en nyclaes voirscr_ jair ende dach alse Recht is vry ende commerloes . Ende elc belouet den and_en scadelois van zinen elften deel . jn oirkonde desen brieue beseghelt mit onzen zeghelen Ghegheue_ jnt jair ons h_en M˚ . + ccc˚ . + acht ende vijftich op den eersten dach van junius .