Corpus Van Reenen-Mulder (CRM14): Oorkonde E167p36402

WJ Jan meliis soen en_ Dirc van Der Dub hughen soen Scepene Jn leyden Doen cond allen luyden Dat quame_ voir gherechte haer hughe hey_ric hougher . bertelmees . willem . Dircx kinder van der Dubbe / ende ermetruyd ende Dirc claer haer sust_en / mit wouter van der bregghe / daniel jans soen / gheriid van der grachte bertelmees soen / en_ mit Dirc van den busch . hoir vier vierendel en_ voecht en_ scouden quit / ende gaue_ ouer toet ene_ vryen eyghen . ysebrant roetaerts soen en_ claes jans soen Die nv ter tiit gasthuus~meesters siin jof diet namaels wezen sullen toet tgashuus behoef toet leyden / Twintich scellinghe holl_ts goets sgelts tsiaers mit den houde die sy ghemienlic hadden op ha_en willem nanen huus en_ erue / en_ beleghen heeft an die ene syde dirc poes jans soen mit sine_ hws en_ erue ende an die ander side hildewaer heynricx docht_ . floriis valc en_ aliit kerstants wedue mit horen huzen en_ eruen / streckende van der hofgrafte an dircx . kinder van der Dubbe voirscr_ hws en_ erue / En_ twinticht scellinghe hollants goet sghelts tsiaers mit den houde die sy hadden op jan vos die talman hws en_ erue dair hi nv ter tiit Jn woent en_ beleghen heeft an die ene syde Jan van brabant mit sine_ hws en_ erue en_ an die ander syde joncvrou saeys stasiins wedue mit hoeren hws en_ erue mit der steghe die daer twische_ gaet streckende van den middelweghe an liisbetten Die gruutster huus en_ erue mit recht en_ mit vo_nesse als scepe_ wiisden dat recht js Jn oirco_de desen brief bezeghelt mit onzen seghelen gheg_ jnt iaer ons heren M˚ ccc˚ . + viue ende tsestich Des Donredaechs na sinte aechten dach - -