Corpus Van Reenen-Mulder (CRM14): Oorkonde E167p36603

WJ daniel jans soen en_ gheriit heerman Scepen In leyden Oirconden dat aelwiin die ca_maker belouede willem willems soen ende ysebrant roetairts soen nu ter tijt Raetslude binnen leyden jof diet namaels wesen sullen tot behoef sgashws tot leyden ses en_ dertich pont hollants jn pamente als die ene Coeman den and_en mede betaelt als van die drie + deel van een hws en_ erue / die dirc bwirs waren en_ ghemie_ legghen mit aelwins vorscr_ vierendel en_ die raetslude vornoemt aelwiin vercoften mit wilken ghelde vors_ en_ mit twaelf pont hollants paments diere sgashuus van aelwiin ontfaen hebben jn reden ghelde dirc buur mede ontfanghen is sine noettoerft te hebben bi rade ende goeddeyncken srecht van leyden jn den gashuus vors_ siin leuen . te betalen dese ses en_ dertich pont voirs_ tot sinte jans misse tot midsoem_ naest~comende en_ wes aelwiin vors_ dan niet en betaelt dat mach hi onderhouden ses jair lanc durende naest~comende sinte jans misse vorscr_ tpont om twie scelling_ hollants siairs jn pame_te vornoemt ende soe tot wat tijt aelwiin wil binne_ der tijt vorscr_ soe mach aelwiin dese vorscr_ beloeften mi_ren tpont jairs mit tien ponden mit den v_screue_ Renten jn pame_te vors_ en_ wes hi niet en minret noch of en doet binne_ der tijt voirnoemt dat sel bliuen staen tot jairlixe_ rente_ tot poirtrecht te v_sien en_ staende op een hws en_ erue dat vorscr_ is en_ aelwiin nu t_ tijt jn woe_t en_ beleghen heeft an die ene side hadewi godeuairt tedemans soens wedue mit ha_en erue ende an die ander side symon Rose mit sine_ huse en_ erue en_ mit ere steghe diere tusche_ gaet jn orconde desen brieue beseghelt mit onsen seghelen ghegheue_ jnt jair ons h_en m ccc ses en_ tsestich op sinte margrieten dach