Corpus Van Reenen-Mulder (CRM14): Oorkonde E167p37501

WJ dirc poes ian pieters soens soen Ende willem foykiaen Scepene in leyden Oirkonden dat voir ons quam willem van lewen dircs soen Ende gheliede dat hi ghegheuen heeft willem sinen soen vijf morghen lants gheleghen in + den ambachte van alphen . die hi hem bewijst heeft an die seuentien morghen Ende vier hont lants . die hi willem sinen soen voirseyt voirtijts ghegh_en hadde te huwelic mit machtelden sinen wiue Ende dit Is in voirwairden . Wair dat sake dat willem van lewen dircs soen voirs_ storue voir willem sinen soen voirnoemt So soude willem will_ms soen voirseyt dese vijf morghen weder in~brenghen ter delinghe ieghen sinen sust_en ende broed_en Ende wair dat sake dat willem will_ms soen voirseyt storue voir willem sinen vader So souden dese voirseyde vijf morghen comen ende eruen Op sinen kind_en ghemeen die hi dan hadde bi machtelden sinen wiue ghered hoghestraten dochter Ende welc van dese kind_en storuen sonder blikende boort So soude des kints deel comen Ende eruen op alle die ander dier te liue bleuen Ende also voirt teen opt ander te eruen van desen goede voirscr_ also langhe alser enich leeft Ende wairt dat si alle storue_ sonder blikende boort . so souden dese voirscr_ vijf morghen lants weder Comen Op willem dircs soen van lewen of op zijn Recht erfnamen Jn kennesse der wairheyt hebben wj scepene voirnoemt desen brief beseghelt mid . onsen seghelen Jnt iair Ons h_en duysent drie hondert viue Ende tseuentich tswoensdaghes na Sente gheertruden dach