Corpus Van Reenen-Mulder (CRM14): Oorkonde E167p38301

Ic jan van alcmade Scout jn + den ambocht van oestgheest Doe Cont allen luden dat voir mi quam jan jacob jonghe dircs zoens zoen . Ende gheliede dat hi vercoft heeft den ghemeene_ joncvrouwe_ van de_ beghijnhoue_ tot leyden van den groten huyse . Een morghen lants . gheleghen jn + den ambocht van oestgheest Jn ghemengheder voer mitten gasthuyse van leyden . Ende . beleghen heeft an die noert~zide ende ant oest~ende die abdisse van der lee . jacobs + docht_ van alcmade an die zuyt~zide Ende ant west~ende florijs van alcmade heynrics zoen alle mid hore_ lande . Ende jan jacobs zoen voirscr_ ende jacob zijn vader loueden mid ghezamender + hant ende elc voir al den joncvrouwe_ voirs_ dese voirnoemde morghen lants te waren Jair en_ dach alse Recht js . ende . men Een vri volboden erue sculdich is te waren Ende jan voirs_ louede jacob zine_ vader voirscr_ hier of scadeloes te houden . Jn kennesse der wairheyt heb jc . jan van alcmade scout voirscr_ desen brief bezeghelt mid minen zeghel jnt jair ons h_en duysent drie + hondert drie ende tachtich op den zesten dach van junio