Corpus Van Reenen-Mulder (CRM14): Oorkonde E167p38601

WJ hughe van der hant En_ syman symans soen Scepene in leyden Oirkonden dat voir ons quam Jacob pieters soen Ende beliede sculdich te wesen dirc van zwieten neghen pond vijftien scellinghe ende tien penninghe holl_s comans payments tsiairs . durende tot ewighen daghen Te betalen alle jair die ene helfte tot voirscoeter marcte Ende die ander helfte tot valkenburgher marcte van enen Camp lants die jacob voirs_ jeghens dirc voirscr_ ghehuert heeft tot poortrechte . behoudelic dirc voirscr_ die ghifte van den lande oec hoet ghesplit worde Voirt so sel men dit voirscr_ erue veruoirhueren waneert in besterfte oft in coeps~wair Coomt mid half den Renten voirscr_ Ende dit voirscr_ erue sel Jacob voirscr_ bruken dat eerste Jair sonder Renten te gheuen En_ dat ander Jair daer na . sel hi betalen mid half den Renten voirs_ Ende dit voirscr_ lant Js gheleghen in den wairt Ende beleghen heeft an die westzide daem hughen soen mid zinen erue Ende an die oostzide ende ant noert~ende dirc van zwieten selue mid zinen erue Ende ant zuyt~ende die rijn . In oirkonde desen brieue beseghelt mid onsen seghelen Jnt Jair ons h_en duysend drie hond_t sesse ende tachtich vp den achtienden dach Jn aprille