Corpus Van Reenen-Mulder (CRM14): Oorkonde E167p38801

WJ goiswiin Claes soen Ende andries hughen soen Scepene in leyden Oirkonden dat voir ons quam willaem nellen soen Ende beliede dirc van zwieten sculdich te wesen achte pond ses scellinghe Ende achte penninghe holl_ns Comans payments tsiairs duyrende tot ewighen daghen / Te betalen alle jair die ene helfte tot voirscoter marcte Ende die ander helfte tot valkenburgher marcte / van enen Camp lants die willaem voirseyt jeghens dirc voirscr_ ghehuert heeft tot poortrechte behoudelic dirc voirscr_ die ghifte van den lande oec hoet ghesplit worde / voirt so sel me_ dit voirscr_ erue veruoirhueren / waneert in besterften / of in Coops~wair Comt / mid half den Renten voirs_ Ende dit voirscr_ erue sel willaem voirghenoemt bruken dat eerste jair sonder Renten te gheuen Ende dat ander jair dair na sel hi betalen mid half den Renten voirscr_ Ende dit voirscr_ lant js gheleghen jn + den ambochte van leyderdorpe jn + den wairt En_ beleghen heeft an die westzide pieter hughen soen / Ende ant noort~ende / an die oestzide willaem heynrics soen . Ende ant zuyt~ende jacob pieters soen Ende daem hughen soen / alle voirscr_ mid horen landen Jn oirkonde desen brieue beseghelt mid onsen seghelen Jnt Jair ons h_en duysend drie hondert acht ende tachtich vp den twalifsten dach Jn mairte