Corpus Van Reenen-Mulder (CRM14): Oorkonde E167p39103

WJ harman bitter en_ dirc Van + der gheest Scepene Jn leyden oirkonden dat voer ons quam pieter maertijns soen ende gheliede dat hi vercoft heeft ghisebrecht bertelmees soen veertich comans groot als in boersen gaet tsiaers Te versien ende staende op een huys ende erue dat gheleghen Js op die hoghewoert en_ beleghen heeft an die een side claes heynrics soen die smit mit sinen huyse en_ erue Ende an dander side dirc Jans soen mit sinen huyse ende erue en_ mit eenre steghe die daer twisken gaet Streckende voer van + der straet after an maertijn claes soens huys Ende dese voirseyde renten alle Jaer te betalen op sinte mathijs dach Ende dat sien voerwaerden dat pieter maertijns soen voirs_ ghisebrecht bertelmeeus soen bewisen mach binnen der stede van leyden tot wat tiden pieter voirs_ wil veertich comans grote alse voirscr_ Js Also veer als ghisebrecht voirs_ also seker daer an Js / als an dat huys en_ erue voirscr_ Jn oirkonde desen brieue bezeghelt mit onsen zeghelen Jnt Jair ons heren duysent drie hondert ien en_ tneghentich op sinte mathijs avont