Corpus Van Reenen-Mulder (CRM14): Oorkonde E167p39201

WJ willaem aernts soen Ende pieter butenwech Scepene Jn leyden Oirkonden dat voir ons quam florijs van den tol Ende gheliede dat hi vercoft heeft Jacob vranken soen drie morghen lants Ende een half hond lants / dat gheleghen Js Jn + den ambocht van coudekerk Jn + den hoghen~wairt / Jn wigghers~weer Ende florijs voirseyt ghemeen hadde mid Jan van den tol zinen broeder / mid vranc ysac Ende mid ermegairt / florijs Jans soens dochter / Ende beleghen heeft an die westzide / gheriid Jonghe dircs soen mid zinen kind_en Claes kengher / Jans erfnamen van poelgheest / heer Jan van poelgheest / florijs van den tol / gheriid kamp / alijt dirc kerstans soens / dirc van den tol Ende pieter vrederix soen / Ende an die ander zide Jacob vinken soen / mouwerijn van der does heynric van der does mitten aelmoes~lande / vranc ysac Ende die butter~camp / alle voirscr_ mid horen landen / Streckende vten rijn vp an den wech Jn + den laghen~wairt / Ende florijs voirscr_ louede Jacob vranken soen voirs_ dat voirscr_ land te waren Jair Ende dach alse Recht Js / als men een vrye volboden eyghen erue sculdich Js te waren Ende allen comm_ of te doen / dier nv ter tijt vp staen mach / Ende florijs voirs_ beliede hem hier of voldaen Ende betailt den lesten penninc mitten eersten In oirkonde desen brieue beseghelt mid onsen seghelen Jnt Jair ons h_en duysend drie honderd twie Ende tneghentich tswoensdaghes na Jairs~dach