Corpus Van Reenen-Mulder (CRM14): Oorkonde E167p39202

Wj pieter wit en_ pieter butewech Scepene jn leyden oirkonden dat voer ons quamen h_en dirc naghel priester jan naghel gherijts soen Ende syman willems soen En_ ghelieden dat si vercoft hebben den deken en_ den capittel tot sinte pancraes te leyden seuen hont lants gheleghen jn + den ambocht van voerhout jn + den hoghen Camp van + den west~egghe jn Ende beleghen is an die noort~side mitter heerstraet / an die oest~side jan naghel gherijts soen / dat zwyt~end meest_ andries mit lande dat sinte jacop cappelrie toe~behoert / welke cappelrie ghesticht js in + der kerken tote voerhout / an die west~syde hughe van alcmade jans soen van + den woude Ende heer dirc naghel ende jan naghel gherijts soen voernoemt loueden mid ghezamender hant den deken ende den capittel voirs_ van desen voerghenomden lande te waren vier hont lants jaer ende dach alse recht is als men een vri volboden eyghen erue sculdich js te waren en_ allen Commer of te doen die daer nv ter wilen op staet sonder ses pennijnghe goets ghelts die op die marghen staen te tijnse / des~ghelijx so louede syman willem soen den deken en_ den capittel voernoemt een halue marghen lants / van + den voerseyden lande te waren jaer en_ dach alse Recht js als men een vri volboden eyghen erue sculdich js te waren Ende allen commer of te doen die daer nv ter wilen op staet sonder ses pennijnghe op die marghen te tijnse alse voirscr_ js . Ende heer dirc jan naghel en_ syman willems soen lieden hem elx van horen aendeel hier of voldaen en_ betaelt den lesten pennijnc mitten eersten In oirkonde desen brieue bezeghelt mid onsen zeghelen Int jair ons h_en duysent drie hondert twie en_ tneghentich opten beloken pijnxster avont