Corpus Van Reenen-Mulder (CRM14): Oorkonde E192p34501

@ @ Alle den ghenen die desen brief sellen sien / of horen lesen / Doe wi v_staen tydeman van + den velde Scoute / johan raet @ dyderic riem de pelser / ghise wouters soen / johan van quinen / willam coevoet / en_ egbrecht van oudenaer @ bure in des abts gherechte van sinte pouwels tutrecht / dat voer ons quame_ int gherechte mathies de vole / en_ @ aue siin wiif / ende gauen aernoud buddinx sone tenen eweliken erfpachte een hofstede gheleghen in de nywestrate van tuintich voeten breed / en_ achte roeden lang / . van + der nyw_strate ter oudellen waert opghemeten / tusschen hofstede mathies en_ auen voerseyt an beden siden / elx iaers o_me seuen en_ tuintich scillinghe suart_ @ tornoyse alsulx payment alse binnen vtrecht ghengaftich is in + der tiid / en_ om tue ghoede pacht~hoenre / te @ betalen de ene helft tot sinte victoers misse / en_ de ander helft tot paeschen / en_ also voert iaerlix eweliken @ Mit dustanighen vorwarden / dat mathies en_ aue siin wiif vorghenoe_de / hore erfname_ / noch hore nacomelinghe nyet meer en moghen v_copen / of wech~gheuen / v_setten / ofte v_sellen dese voerseyde hofstede / en_ de husinghe die daer nv op gheti_mert staen / of hiir na gheti_mert w_den ond_ sulken pacht en_ vorwarden alse hiir voer bescreuen staet @ en_ behouden den heren van sinte pouwels tutrecht hoers tins en_ al hoers rechts / en_ dien tins sullen mathies en_ @ aue vorghenoe_de / en_ hore nacomelinghe iaerlix wt~reken en_ verwaren buten des voerseyden aernouds cost en_ sire nacomelinghen / Jn orconde deser dinghe / so heb ic tydeman van + den velde Scoute voerseyt desen brief beseghelt mit minen @ seghel / En_ wi vorghenoe_de bure orconden dit en_ tughen onder des Scouten seghel voerseyt / want wi selue ghene seghelle @ en hebben . ghegheuen int iaer ons h_en dusent dre + hondert + / viif en_ viertich des donredaghes na mitvasten