Corpus Van Reenen-Mulder (CRM14): Oorkonde E192p35501

@ @ Wi borghermeysters Scepene en_ ghemene Raet der stat van vtrecht / Maken cont allen luden / dat johan van clarenborch onse borgher mit @ zinen vryen wille ghegheuen heeft / om goeds wille / en_ om zire zielen orbaer / dese Renten die hier na bescreuen siin / alse van vijf @ en_ twintich groten / en_ twe hoenre siaers in eenre hofstede gheleghen in + de watersteghe / tusschen der heren hofstede van sinte johan aen die @ ouer~zide / en_ der heren hofstede van sinte katrinen aen die neder~zide / Voert twe pont en_ achte hoenre siaers in eenre viertel lants @ gheleghen opt veen / die Roelof scouten soen in pachte heeft / daer alaerd van + den veen en_ willam van rijswijc naest ghelant siin aen @ die ouer~side / en_ die heren van sinte katrinen / en_ sinte barbaren outaer in + des heylichs cruys capelle aen die neder~side armen @ luden scoen jaerlix daer of te + gheuen / eweliken duerende / Van welker voerseyder rente / wi den eyghendom ontfanghen hebben / jn @ zulken vorwarden / dat johan van clarenborch voerseyt / also langhe alse hi leeft / dese voerseyde rente alinghe opboeren zel van @ jaer te jare / en_ daer of gheuen zel armen luden elken een paer scoen / tusschen alreheylighen dach en_ korsauont / also veer @ alse dese voerseyde rente strecken moeghen / en_ daer hem dunct dattet best aen bestaet is / En_ na johans doot voerseyt so sel @ siin oudste zoen / en_ die twe kercmeysters van buerkerke tutrecht / die dan ziin in + der tijd dese voerscreuen Renten voert @ opboeren van jaer te jare / en_ daer of scoen gheuen armen luden / tot zulker tijd en_ in allen manieren alse voerscreuen is @ En_ na siins soens doot voerscreuen / so sel die ghene die bezitter waer des eyghendoms der husinghe en_ hofstede te Clarenborch @ mitten tween kercmeysteren die dan siin in + der tijd tot buerkerke tutrecht / dese voerscreuen Renten voert opboeren van jaer @ te jare / en_ daer of scoen gheuen armen luden tot zulker tijd en_ in allen manieren alse voerscreuen is / Voert siint vorwarden @ dat die achte hoenre siaers die gaen vter viertel lants voerscreuen / erfliken bliuen zellen / aen johan van clarenborch voerseyt @ en_ an + den ghenen die bezitter wert des eyghendoms van + der husinghe en_ hofstede te Clarenborch vorghenoe_t / alle archeyt @ wtgheset / jn orconde des briefs bezeghelt mit onser stat seghel deser brieue siin / twe / ghegheuen jnt jaer ons h_en dusent @ dre + hondert vijf en_ vijftich op sinte pontiaens avont : . ~