Corpus Van Reenen-Mulder (CRM14): Oorkonde E192p35801

@ @ Alle den ghenen die desen brief zellen zien / of horen lesen . . Doe wi verstaen / Scoute / ende scepene der stat van vtrecht / . dat voer ons quam Jnt gherechte / haer abraem @ de visscher / preester / ewelijc vicarijs / in + der kerken tot Oudemonster tutrecht / Ende toende aldaer mit siins ghecorens voghets hant . daer hi mit rechte / ende mit ordele @ ane quam / enen erftinsbrief / in latine ghescreuen / gans / ende gaue / ende wel beseghelt . sprekende van woerde te woerde in deser manieren . . (onleesbaar) . . Doe dat ghedaen was doe gaf haer abraem @ de visscher voerseyt / mit sinen vryen wille / ende mit siins ghecoren voghets hant Ermbrecht pellencussen sinen neve / die husinghe / ende hofstede voerghenoemt / op zulken @ pachte alse gheleghen siin . . Mit sulken vorwaerden / dat ermbrecht voerseyt / ende siin nacomelinghe / den pacht betalen zellen / die vter hofstede gaet / die de voerseyde @ latinsche + brief begrepen heeft . Ende daer toe zel hi alle iare wtreyken / ende gheuen sestien pont pe_ninghe / payments / dat in + der tijd der betalinghe / ghenghe / ende gaue @ wesen zel binnen onser stat / alse die ene helft / tot sinte victoers misse / ende die ander helft tot paschen . Ende also voert iaerlix eweliken / welke sestien pont voerscreue_ @ opboren zellen / ende heffen die oudste kercmeyster / die de stat van vtrecht / setten zel in + der tijd / tot buerkerke / Ende joncfrou mechtelt haren abraems zuster voerseyt . @ + Ende na joncfrou mechtelden doet voerscreuen / zel die oudste manhoeft / die van horen liue ghecomen ware in hore stat heffer wesen / ende en waer daer gheen manhoeft / die @ oudste vrouwenaem / die van horen liue ghecomen ware . . Ende verstoruen si alle die van ioncfrou mechtelden liue voerseyt / ghecomen waren / so sel die naeste maech / die haer @ abraem voerseyt / dan hebben zel / die van siins vaders / of van sire moeder liue ghecomen ware heffer wesen mitten kercmeyster voerscreuen . . Ende dese voerseyde sestien @ pont siaers zel ermbrecht voerseyt / ende sine nacomelinghe / erfliken / ende eweliken betalen ten voerseyden terminen vter husinghe / ende hofstede voerscreuen / na haren @ abraems visschers doet voerghenoemt / ende nyet eer / Ende daer mede zellen die ghene / die heffers wesen zellen va_ + de_ zestien ponden siaers voerscreuen / alle iare tieghen sinte @ victoers misse copen / also vele hemden / ende scoen / alse si kunnen / ende moghen mitten sestien ponden voerghenoemt / ende die hemde / ende scoen / zellen si dan gheuen / den @ armsten luden / die si weten bi hore co_scienci / daer + se beste ane bestaet siin / ende elken armen minssche zellen si nyet meer gheuen / dan een hemde / oft een paer scoen . . voert @ sel elc kercmeyster van buerkerke voerseyt / die wesen zel in + der tijd / ende die naeste maech die gheuer wesen zel van + den hemden / ende scoen voerscreuen / alle iare hebben @ horelijc van hem dreen / op sinte victoers dach / ene halue take wiins van + den sestien ponden siaers voerghenoemt / voer horen arbeyt / ende op~dat si dit te + bet verwaren / en_ @ in hoghenisse hebben . . Voert siint vorwaerden / dat haer abraem voerseyt / dese voerseyde husinghe / ende hofstede / hebben ende behouden zel tot siinre rechter lijftochte @ also langhe / alse hi leeft . . Dit ghesciede onder johanne van + den spieghel scoute . . aernoud Riem / henric de witte / Tydeman vrencke / Tydeman de langhe / wouter van + den @ velde / andries van driel / Tydeman zoudenbalch gheraerds sone / wernaer van drakenborch . / johan de wale / florans van jutfaes / Tydeman van + den luttikenhuze / ende @ johan van clarenborch / scepene tutrecht / Ende op~dat dit vast / ende stade bliue / so hebben wi scoute / ende scepene voerghenoemde / onser stat seghel an desen brief @ ghedaen tenen orconde . . Deser brieue siin dre . . / ghegheuen jnt jaer ons heren / Dusent + / Dre + hondert + / achte + / ende vijftich des Dinxdaghes na zinte Pet_s / en_ zinte Pouwels dach