Corpus Van Reenen-Mulder (CRM14): Oorkonde E192p37502

@ @ Alle den ghenen die desen brief zellen zien of horen lesen Doe wi verstaen Scoute en_ Scepene der Stat van vtrecht dat voer ons quam jnt @ gherechte goude van voerscoten En_ dade horen sciin~eed dat si horen rechten mombaer op die tijd nyet hebben en mocht stadicheyt mede te + doen @ En_ si coes enen and_en mombaer mit rechte en_ mit oerdele alse zi sculdich was te + doen Doe dat ghedaen was aldaer zo gaf goude voerseyt mit @ hoers ghecorens mombaers hant aleyden van + der wade dat huys en_ hofstede daer zi twe nv in woenen egghen en_ eynden op zulken pacht @ alse gheleghen is opt heylighe leuen daer kerstine en_ hildegont mit enen huze dat johannes van hoye was bouen naest ghelant siin en_ johan @ riems huys beneden Voert een husinghe mitter hofstede op zulken pacht alse gheleghen is opt heylighe leuen voerseyt / daer katrine spruyt @ nv op woent tusschen h_en tydeman blanckaerts husinghe aen die ouerside en_ fye voncken aen die nederside En_ daer toe gaf si der voerseyder @ aleyden anders alle goets dat si hadde roerende en_ onroerende ghewonnen en_ onghewonnen dat si na hore doot after hoer laet jn deser @ manyeren dat die rente die van + den voerseyden huze daer katrine spruyts voerseyt in woent jaerlix coemt en_ versciint bouen den pacht die @ daer wt gaet gaen sellen in oerbaer en_ in nvtscap ter ty_meringhe der husinghe voerscreue_ daer zi nv in woent / welke voerscr_ husinghe @ daer goude en_ aleyd voerscreuen nv in woenen bewoenen sel die voerseyde aleyd also langhe alse zi leeft / en_ zi zel mit hoer in~nemen mitter @ woene goede minschen / wiue of joncfrouwen tot tween personen toe of meer die hoer brodekiin winnen sellen binnen dien huze en_ god te @ dienen en_ godlijc leuen te + leyden en_ na deser voerseyder gouden doot zel die oudste kercmeyster van buerkerke / die dan is in + der tijd mitter @ oudster joncfrouwen die langste in + den huze ghewoent hadde dese goede menschen in + den voerseyden huze ontfaen te + woenen en_ na horen goet-duncken ordineren om goedswille puerlijc en_ simpelic en_ nyet om maesscap @ noch om zwagherscap en_ hoet die oudste kercmeyster van @ buerkerke en_ die oudste joncfrou of wijf in + den huze alse voerseyt is in elker tijd mitten goeden minschen tontfaen en_ wt te + setten ordine-ren en_ maken dat sel tot ewighen daghen stadicheyt hebben En_ des ghelijcs sel die oudste kercmeyster / mit aleyden of mitter oud-ster joncfrou of wijf die dan in + den huze waer / waer si afliuich der voerseyder gouden goet / dat zi after hoer laet / van reden goede @ bouen hare scout vtinghe en_ testament voer gouden ziele gheuen en_ delen goeden armen minschen in + den voerseyden huze en_ anders @ daer hem dunct dattet beste aen bestaet is bi hore zielen Dit ghesciede onder willam ouer de vechte Scoute herman va_ lochorst @ johan van groenenwoude wernaer van drakenborch jacob de Cuper willam van + der weyde wernaer braem henric de witte alfer van @ nyendale gherijd vrencke Peter johan scoenheynen zoens soen Claes van loenen / en_ johan van alendorp Scepene Tutrecht En_ opdat dit vast en_ stade bliue so hebben wi Scoute en_ Scepene vorghenoe_de onser Stat seghel aen desen brief ghedaen tenen orconde @ Deser brieue siin twe / ghegheuen jnt jaer ons h_en dusent dre + hondert vijf en_ tseuentich des dinxdaghes na sinte margrie-ten dach : - ~ - /