Corpus Van Reenen-Mulder (CRM14): Oorkonde E192p39702

@ @ Alle den ghenen die dezen brief zellen zien of horen lezen Doe ic verstaen herman matheus soen dat ic dat kenne en_ lye dat de abdisse ende tghemene Convent van oudwiic bi vtrecht gheconsenteert hebben alsulke huurweer @ als mi johan spierinc van weghen mertens broeder jacobs soen en_ philips johan spierincs soens voerscr_ verhuert heeft an zulken lande als zi van + den Convent voerseyt in pachte hebben Tot liue mertens en_ philips voerseyt en_ twalef iaer lang na der lester doot van hem beyden daer de morghentale of beloopt dat ics hebben zel Enen haluen morghen ende vierde + half voete lants alzo alze gheleghen ziin opstreckende van + den steenwech @ tot an amicke~pat toe daer henric iohans zoen boven en_ ysebrant des piinres erfnamen beneden naest ghelant siin Mit lande dat zi van + den Convent voerseyt in pachte hebben van wilken lande voerseyt @ enen wech zel legghende bliuen an + den nederen egghe van eenre roede breet daer dit lant en_ anders die des Convents goede bruken wt ende in weghen zellen En_ dit lant zel ic an + den wech op minen cost houden @ wilc lant voerseyt zi mi in huurweer ghegheuen hebben bi wille en_ consente der abdissen en_ Convent voerscr_ viiftich iaer lang naest comende jngherekent van zinte peters misse ad Cathedram naest comende @ Ende de abdisse ende Convent voerseyt hebben ghelooft mj of minen erfnamen ghebrake miins waert dat merten en_ philips voerseyt beyde ofliuich worden ente twalef iaer na der lester doot van hem beyden om~ghecomen ware_ @ eer deze viiftich iaren voerscreuen om~ghecomen waren So wes iaren mi dan van + den viiftich iaren voerscreuen afterstandich waren dat zi mi die dan voert houden en_ voldoen zouden om alzulken pacht en_ in allen manyeren ende @ vorwaerden als hier na bescreuen staet Dat is te + verstaen Elx iaers om drie goede oude gulden vrancriics scilde of paeyment dat daer ghoet voer is in der tiit der betalinghe vriis ghelts sonder enich ofcortinghe ofte verminringhe van enighen onghelde ofte onrade dat nv leyt ofte namaels vallen mach opten voerseyden lande wtghenomen of de bisscop van vtrecht bi ziinre ecclesien bi + den goeden luden van zinen lande en_ steden ene ghemene scattinghe creghe in + den lande van vtrecht alze van morghen~ghelde zo wes dat den Convente voerseyt daer of gheboerde te + ghelden alze van dezen lande voerseyt dat zel ic tevoeren wtlegghen en_ slaent weder of van + den eersten pachte Te + betalen binnen horen goodshuse voerscr_ deen helft op zinte martiins misse in den winter Ente ander helft tot sinte peters misse ad Cathedram of binnen viertien daghen na elken termine voerseyt @ onbegrepen En_ also voert jaerlix de jaren voert wt de mi ontbraken an + den viiftich iaren voerscr_ Ende waert dat ic of miin erfnamen de betalinghe des pachts voerseyt tot enighen termine versumeden en_ nyet @ en ? te + goeder tiit alze voerscr_ is zo moeghen zi of hoer ghewaerden bode mi tot allen zes weken daer naest comende enen goeden haluen ouden vrancriicschen scilt meer wtpanden gheliic den voerscreuen @ pacht wt minen reetsten goede ter tiit toe dat ic hem betaelde den verschenen pacht mitten verschenen haluen ouden scilt de wi versuumt hadden Ende waert dat ic of miin erfnamen hem horen verschene_ pacht @ mitten verschenen haluen ouden scilden nyet vol en_ al en betaelden binnen jaers na dien termine dat wi de betalinghe van + den voerscr_ pachte versumeden zo vielen wi van deser huurweer en_ claerlic van al rechts @ en_ toesegghens dat wi hadden an + den voerscreuen lande En_ so quaem dit voerscr_ lant weder vry en_ los an + den Convent voerseyt horen vrien wille daer mede te + doen zonder yemants weder~segghen also verre @ alze ziit opnemen wouden en_ anders nyet behouden hem nochtan al hoers versetens pachts mitten verschenen haluen ouden scilden de wi versuumt hadden Voert siint vorwaerden zo wes coep op desen voerscr_ @ lande gheviele het waer van husinghe van twn of van tymmert of van huurweer van jaren cort of lang de ic ghehuert hebbe of de ic voert verhueren mach binnen dezen voerscreuen jaren alzo @ dicke alst gheviele daer zoude ic hem den voercoep of bieden en_ gheven viif scillinghe min dan daert een ander om hebben zoude ter witteliker waerheyt Ende daer zouden zi viertien daghe lang hoer beraet @ op hebben En_ en namen ziis binnen dien viertien daghen nyet an zo mocht ic miin orbaer daer mede doen sonder erghelist Ende waert dat ic tenden den viiftich iaren voerscreuen nyet weder in~hueren @ en mocht om redelike weerde zo zouden zi mi ghelden zo wes ic of miin erfnamen opten voerscreuen lande ghebrocht hadden om redelike weerde Voert ziint vorwaerden dat ic en_ miin erfnamen Dit voerscreuen lant altoes zellen beteren mit poten en_ tymmeringhe en_ nyet ergheren en_ anders ? orbaer daer mede doen deze voerscreuen iaren wt in allen manyeren als hier in bescreuen staet @ En_ op~dat dit vast en_ stade bliue en_ ic zelue ghenen zeghel en hebbe op dese tiit zo hebbe ic ghebeden Johan woutman desen brief ouer mi te + beseghellen mit sinen zeghel tenen oerconde Ende ic johan woutman voerscreuen hebbe om bede wille herman matheus soens voersc_ minen seghel an desen brief ghedaen tenen oerconde ghegheuen jnt jaer ons heren dusent dre + hondert zeven en_ tneghentich op sinte lucyen @ ?