Corpus Van Reenen-Mulder (CRM14): Oorkonde E198p31401

Wi Scepene ende Raetsmanne van delf orcunden . Dat wi een zeggen ophadden tuisken enen eerzamen man h_en jan den proost van coninxvelt an die eene zide / ende arnoude van rijswike an dander zide / van vijf ponden ghelds iaerlixer renten . + die dese vorseide h_e jan ende tcouent van coni_xvelt hadden op zeuen morghen lands die arnts van rijswike waren en_ op and_s al zijn goed . also alse wi in lett_en die dar op ghemaect waren clarliken hebben verstaen . / . die des an beiden siden an ons zien ghebleuen / en_ hebben ze ghesceiden in deser manieren . ende aldus / Dat dese vorseide h_e jan die proost ende zijn couent hebben zellen zeuen morghen lands eyghens lands . die des arnts waren leggende in rijswiker ambochte / tuisken vriezen~swette en_ den maes~slote die vier morghen . streckende metter eenre zide an die grote swette / en_ dese vier morghen waren hier vormaels h_en engebrechts van rijswike / en_ die drie morghen leggende an den zeluen vorseiden maeslote / streckende metter eenre zide langs des gasthuis lande . ende metter ander zide langs des wighers lande . tote der groter swette toe / wilke vorseide drie morghen lands hier vormaels waren jans van den dorpe / Ende zo wat des vorghenoemts lands meer ware dan zeuen morghen . dat zoude die vorghenoemde h_e jan die proost . arnde voldoen en_ ghelden / alst beliepe in zettinge / die morghen vore tien pond . ende wars min / dat zoude arnt van rijswike den vorghenoemden h_en janne en_ zinen conuente wed_en ende ghelden die morghen vore tien pond met ghereden ghelde . Ende arnout van rijswike vorseid heeft verlijt vore ons dat hi den vorghenoemden h_en janne tote des godshuis behoef van coninxvelt ene vrie ghichte ghegheuen heft van desen vorscreuene lande vore den scoute ende vore die bure te rijswike an den dinxstal . hier bi zo hebben dese vorghenoemde h_e jan en_ zijn conuent verteghen ende quite ghescouden die vijf pond gheld? die zij hadden op arnd van rijswike en_ op and_s al zijn goed . Jn kennesse ende in ghedenkenesse van desen dingen / zo hebben . wi Scepene ende raetsmanne van delf desen brief bezeghelt metten inzeghele van onz_ porte / jnt iaer ons heren . Dertien hond_t ende viertiene des vridaghes na zente mattijs daghe / / /