Corpus Van Reenen-Mulder (CRM14): Oorkonde E198p40001

Wi ghijsbrecht van andel bi der ghenaden gods proest van conijnxvelt priorinne onder~priorinne ende ghemeen couent des seluen cloosters . doen cont ende kenlic allen luden dat wi mit goeder eendrachticheyt ende bi consent ons ouerste ende ons vad_ abs des abts van sinte . + marien~waerde verh˚yert hebben arnd dirx soen viertien hont ende vijftich ghaerden vrijs lants bin den wal sinen vrien wille me te doene welc lant gheheten es den vter~dijc van wigghers lant ende ghelegen is twisschen die scie ende den oostwech ende hebben beleghen an die zuut~side heer coenraet priester ende herman hobben soen mit lant ende erue Ende dair an die noort~side willem tsconinx soen den steen wt slaet . om elf pond tsiairs hollants payments erfliker renten te betalen alle iair tot sinte martijns misse in + den winter welke renten ons aernt voirscr_ wel bewijst heeft op sekeren goeden . welc lant aernd voirscr_ of siin nacomelinghers hebben ende ghebruken sellen tot der tijt toe dat hijt of sijn nacomelinghers wtghesleghen heeft teerste mitten lesten ende na + der wtdelinghe des lants voirscr_ so sel die proest van coninxvelt priorinne onder~priorinne ende tgemeen couent des cloosters voirscr_ den gront van desen lande . voir eyghen aen~tasten ende vrilic ghebruken sonder yements weder~segghen . Ende wi ghijsbrecht van andel proest voirscr_ priorinne onder~piorinne des couents voirscre_ hebben gheloeft ende ghelouen voir ons ende voir onse nacomelinghe aernd dirx soen voirscr_ ende sine nacomelinghe dit lant voirscr_ te waren tot sulker tijt als voirseyt is ende wairt dat aernd voirscr_ of sijn nacomelinghe yet an desen lande ontbraec dat sellen si verhalen op onse goodshuus goede soe~waer dat si ghelegen sijn ende des en sellen wi ons niet weren mit gheesteliken rechte noch mit wairliken rechte noch niemant van onsen weghen Ende om~dat dit wair is ende wi willen dat dese voirscr_ h˚eyr stade ende vast ghehouden bliue van ons ende van onsen nacomelinghe aernd voirscr_ ende sijn nacomelinghe na alre manieren als voirscr_ is So hebben wi ghiisbrecht van andel proest voirscr_ priorinne onder~priorinne ende ghemeen couent des cloosters voirseyt desen brief mit onsen seghelen open bezeghelt Ende om die meere zekerheyt willen so hebben wi ghebeden enen eersamen gheesteliker vader den abt van sinte marien~waerde onsen ouersten ende vader abt dat hi desen brief mit ons bezeghelen wil Ende wy willaem abt van sinte marienwaerde voirscr_ om beden Wille des proests priorinne onder~priorinne ende des ghemeens couents van conijnxvelde voirscr_ so hebbe_ wi desen brief open bezeghelt mit onsen zeghel Jnt Jaer ons heren dusent vier + hondert op onser vrouwen dach purificacio