Corpus Van Reenen-Mulder (CRM14): Oorkonde E198p40002

Jc aernd dirx soen doe könd ende kenlic allen luden Dat ic aan~ghenomen hebbe van + den proest van conijnxvelt der priorinne onderpriorinne ende van + den ghemeenen couent des seluen cloosters viertien hont ende vijftich ghaerden vrijs lants binnen wal . minen vrien wille mede te doene of mijn nacomelinghers toter tijt toe dat ic aernt voirscr_ of mijn nacomeling_ dit voirscr_ lant al wtghesleghen hebbe dat eerste mitten lesten . Ende als dit lant voirscr_ wt~ghesleghen is so sel die proest ende tcouent voirscr_ den gront van desen lande voirscr_ aen~tasten ende hair eyghen houden ende ghebruken sonder y˚emens wedersegghen Ende ic arnt dirx soen sel + den proest der priorinne onderpriorinne ende den ghemenen couent voirscr_ voir dit voirscr_ lant gheue_ elf pond tsiaers hollans payments erfliker renten durende tot eweliken daghen . Jn + te + nemen ende te betalen alle iaer tot sinte martijns misse in + den winter welke renten ic aernd voirseyt bewise den proest priorinne onderpriorinne ende den ghemene_ couente voirscr_ . op een molen die ic nu ter tijt staende hebbe binnen + der stede van delf Jn tnoerd~eynde op die west vest . Ende op viertien morghen lants die ic nv ter tijt legghende heb te dijxhoirn . Durende ter tijt toe dat ic aernd voirscr_ den proest van conijnxvelde priorinne onderpriorinne ende de couente voirscr_ dese voirscr_ renten beleyt hebbe binnen delf of dair buten dair goeden luden duncket dat dat couent wel mede bewaert en_ seker ghenoech aen + sijn . Ende dan so sel die molen ende dat lant voirscr_ vri en_ quijt wesen van + der onderborchtocht der renten voirscr_ ende alle dinc sonder arghelist Ende om~dat dit wair is ende ic aernd dirx selue ghenen zeghel en hebbe so heb ic ghebeden kerstant van alcmade Jan hwchs~roden soen Ende clays aernd vridach + soens soen minen neve dat si desen brief voir mi bezeghelen willen Ende wi kerstant van alcmade Jan hwchsroden soen en_ clays aernd soen voirscr_ om beden wille aernds voirscr_ So hebben wi desen brief bezeghelt mit onsen zeghelen Jnt Jaer ons heren duse_t vier + hondert op onser vrouwen dach purificacio