Corpus Van Reenen-Mulder (CRM14): Oorkonde E209p34801

WJ jonghe jan de clerc dideric de poert_ en_ gheraert meliis sone scepene jn der goude oerkonden en_ kennen mit desen brieue beseghelt mit onsen zeghelen Dat q_m voer ons heynric allaerts sone en_ lyede dat hi v_coft heeft matthiis truden sone die houder is van desen brieue een pont holl_s jaers an renten jof payment dat daer voer gaet welc pont jaers heynric allaerts sone ghecoft hadde ieghens dideric nobben Eweliken te stane op een huijs en_ erue dat gheleghen is an de oesterside van der verwer~brugghe ten reghenboghe waert Ende heeft beleghen mit erue willaem de vriese op de noertside En_ willaem zasse op die zuytside alle jare te betalen dene helft op alre goeds heylighen dach ende dander helft opten meye~dach Ende telken daghe voerseyt te betalen mit ghelde jof mit panden alze recht is van erfrenten van welken pont jaers heynrich allaerts sone voerseijt goede brieue of hadde die scepene beseghelt hadden en_ ghemaket was jnt jaer van viertighen des eersten dinxdaghes in marthe En_ heynrich allaerts sone heuet dien brief gedoet En_ desen brief ghegheuen matthiis truden sone jn allen manieren alze hiit hadde jn den ouden brief ende in desen brieue ghescreuen is eweliken duerende En_ om~dat wi scepene voerghenoemt dien ouden brief ghesien hebben daer dese ute is ghemaeckt zoe hebbe wi desen beseghelt mit onsen zeghelen tot matthiis truden soens behoef jof siinre nacomelinghe Ghegheuen des zaterdaghes na sinte valentijns dach jnt jaer ons he_n m ccc acht ende viertich