Corpus Van Reenen-Mulder (CRM14): Oorkonde E209p35101

Wj willem die vriese pieter van stolwiich en_ helmaer damaes sone scepene jn der Goude orkonden en_ kennen met desen brieue beseghelt met onsen seghelen dat q_m voer ons diederich die brune en_ lyede dat hi v_coft heuet gherart en_ katerinen des jaghers kindere die houdere siin van desen brieue thien scellinghe holl_ jars an renten in payemente daer men broet en_ bier mede coept vp der straten sonder archeit welke thien scellinghe jars diederich die brune voerseit hadde ghecoft an symon des waiers huis en_ erue dat hi staende heuet vp der goude En_ heuet beleghen met erue ysebrant jan sone vp die ene side en_ diederich reinwart sone vp die andere side alle jare te betalen vp sente bauen dach met ghelde jof met panden alse recht es van erfrenten En_ met desen brief es ghedoet een ouder brief die diederich die brune voergenoemt sprekende hadde vp symons waiers huis en_ erue voerghemerket van desen seluen renten die ghemaket was in die jaer ons he_n m ccc en_ viftich jn orkonden van desen brieue Ghegeuen des wonsdaghes vp sente matthiis auent jnt jaer ons he_n m ccc en_ ene en_ viftich