Corpus Van Reenen-Mulder (CRM14): Oorkonde E209p39301

Wij pieter hermans soen jacob minne florijs soen ende Jan gijsbrechts soen Scepene binnen der goude orkonden en_ kennen dat quam voer ons matheeus matheeus soen en_ wan mit allen vollen rechte in Een pandinge enen ouden vrancricxe vranc goet van goude en_ van ghewichte of paeyment dier Waerde En_ twee groet tsiaers an renten Eewelik d˚erende op lyclaes pleyen twee cameren en_ erven die hi nv ter tijd staende heeft jn der Voghelen~zanc En_ hebben beleghen mit erven jan gheenen soen an die zwtzijde En_ allaert allaerts soen an die noortzijde alle jaer te betalen op ons_ vrouwen avond te lichtemisse mit ghelde of mit panden alse recht is van Erfrenten voort So heeft hi ghewonnen mit allen rechte waer dat sake dat dese cameren en_ erven niet goet ghenuegh en waeren voer dese renten dat hi hem voert verhalen sel an gherijd dijrc Weijghers soens hws en_ erve dat hi nv ter tijd bewoent in der voghelenzanc En_ hebben beleghen mit erven herman die goede an die zwtzijde En_ gherijd hoen an die noertzijde Ende mit desen brieve So is ghedoot enen ouden scepen~brief daer dese renten wt roeren die ghemaect was Jnt jaer ons he_n m ccc en_ tneghentich op Sinte mychiels dach also~dat dese brief macht hebben sel van + den daten voers_ Jn + kennes_ der waerh_ beseghelt mit onsen seghelen Gheg_ op ons_ vrouwen avond te lichtmisse Jnt jaer ons he_n m ccc drie en_ tneghentich