Corpus Van Reenen-Mulder (CRM14): Oorkonde E209p39303

Wij pieter hermans soen Dijrc be˚dekiin volcwijns soen en_ Jan gijsbrechts soen Scepene binnen der goude orkonden en_ kennen Dat quam voer ons Jonghe Jan daems soen Ende lyede dat hi sculdich is hughe dijrcx soen thien scellinghe holl_s b˚erseghelts tsiaers an renten Eewelik d˚erende op Siin hws en_ erve dat hi nv ter tijd bewoent jn der voghelenzanc En_ hebben beleghen mit erven blinde reynkiin an die noertzijde en_ ian mitten ghelde an die zwtzijde alle jaer te betalen op Sinte baven dach mit ghelde of mit panden alse recht is van Erfrenten , voert So quam voer ons oude Jan daems soen En_ ghelouede hughen voors_ waer dat sake dat Siin renten voers_ niet sekert ghenoech en waren an dit voers_ hws en_ erve Dat hi hem Dan voert verhalen sel an oude jan Daems soens hws en_ erve Dat hi nv ter tijd bewoent in claes knoken stege naest Jans mitten ghelde oestwaerts En_ jonghe jan Daems soen ghelooft oude Jan Daems soen Scadeloos te houden op al Siin goet Soe waer hijd heeft jn + kenness_ der waerh_ beseg_ mit onsen seghelen gheg_ Des vrydaghes na Sinte baven dach jnt jaer ons he_n m ccc drie en_ tneghentich