Corpus Van Reenen-Mulder (CRM14): Oorkonde E543r31701

VvI Bartould van Oye bi + der Ghenade Goeds abt van Egmunde Ende dat mene couent ter seluer stede maken cond allen luden / Dat wi in ieghen~woerdecheiden Eersummegher luden haren yseb_nds van petten priester ende aelbrechts florens zone knape / Ende anders vele goeder lude metter hand haren screuels ons prioers van haren willame van svaech / ende sinen mo_baer ontfanghen hebben jn rechter aelmossen enen vrien Eyghendoem enen vrien Eyghendoem van aldus ghedaenenghen Goede alse hier na ghescreuen staet (onleesbaar) . den eersten dat Erue dat hi coft ieghen haren florens p_sonre van lymben ende wouter sinen broder strekende van dien pade dat vore sijn huus gaet vut an + die mere wtghenomen nsine husinghe ende sine hemwerf also verre alst bedoluen is of beglint op dese wile . voerd dat erue dat vore sijn huus leghet aen~Ghaende van dien voerzeiden pade die vore sijn huus gaet also breed alse dat ander vorezeide land opgaende aen willa_s weends bloc dat hi wandelde ieghen pauwels van zuden voerd dat erue daer hille clais ydinghes dochter op woent dat hi coft ieghens die beghine van haerlem voert drie mat made legghende ouer die mere te~samen die hi coft dat ene ieghens dat goedshuus van + der wijc / dat ander ieghen didde pinghen . en_ dat derde jeghen didde danser voerd enen haluen acker legghende bi willams des ? huus op die noert~zide dat hi coft ieghens ysebrande lantier voert drie stucke lands die legghen ieghen die kerke ouer dien Egmunder wech die hi coft ieghens dat Goedshuus van + der wijc . voert een sticke lands dat hi wandelde ieghen voppen stiefkijnder van der kerke voert tve gheerse legghende buten dike die heten dat virendeel van floeiers hem jn deser maniren dat haer willam van svaech voerzeid besitter bliuen sel van desen voerzeiden erue tot sijnre doet toe Ende na sijnre doet so sellent besitten sine tve zonen willam Ende symon die hi ghewonnen heeft bi fien amelijs dochter Ende euerocker sijn outste broder ende sijn mo_baer is + t dat hi leeft na sijnre doet doe sel bedriuer wesen van desen goede vorezeid ende mo_baer dere kijnder in deser maniren dat die kijnder ende hare mo_baer vutreken sellen jaerlics tien scellinghe Gheilds onsen couente tote petansien op dien rechten dach sijns jareghetijds so sel onse couent vorezeid sijn jareghetide doen Gheliken onsen andren brodren . Dit sellen die kijnder doen also langhe alse der een leeft bi haren mo_baer Ende na + der kijnder doet vorezeid so sel dit vorenoemde land ghehelike comen op onse Goedshuus onsen vrien wille mede doen Ende wi sellen haren willame vorezeid voldoen jn broderscap in jareghetiden in allen zaken alse wi hem gheloeft hebben ewelike sonder ghebrect Ende om~dat dese vorezeide sticken stade ende vaste bliuen so heb wi Bartould van oye abt van egmu_de Ende onse couent vorescreuen dese letter ghezeghelt met onsen zeghelen vutghehanghen Ghegheuen in + den jare ons he_n derthien honderd ende seuenthiene des naesten daghes na onser vrouwen daghe verholen .