Corpus Van Reenen-Mulder (CRM14): Oorkonde E543r38101

Ic Reyner Jan reyners zoens zoen Doe condt en_ kenlic allen luden dat ic ontfaen hebbe van + den Abt en_ tgoedshuus van Egmond voer mannen des goedshuus voers_ tot enen erfliene en_ niet te versterven tot een eerste lit toe alsulc goet als miin vader ende miin oudevader van + den goedshuus voers_ te leen plaghen te houden gheleghen binnen den ban van akersloet en_ hier na ghescreuen staet Jn + den Eersten drie garde lants op riip streckende van + den westdijc totten gherslande twischen ghiesten en_ is gheheten vroenlant It_ vier garden an + die noertzide van vierhusen streckende van + den westdijc totten graslande voers_ en_ is gheheten vroenlant It_ twie garden ouer den wech neuen reyners voers_ huus streckende an tgraslant voers_ It_ twie gheerse an die zuutzide van + den roemers~dijc en_ is gheheten dijcven Ende / dit voers_ goet sal altoes comen op den outsten en_ den naesten van miner rechter zwaertzide en_ emmer die zoen die voerhant te hebben voer die dochter en_ die iongher man voer touder wijf daer si beide euen na siin Jn kennesse der waerheyt so heb ic desen brief daer of bezeghelt met minen zeghel Ghegheuen Jnt iaer ons heren dusent drie + hondert een en_ tachtich des dinghesdaghes na sente Agneten dach