Corpus Van Reenen-Mulder (CRM14): Oorkonde E563r38101

wi heynric van houte scoute van limmen ende van oesdoem scepene ende ghemeene huurliede des vroenlants te seluer stede doen cond allen luden dat alle die~ghene die vroenlant houden te limmen ende twischen limmen ende outburgherlaen van eersamen luden den abt van egmonde ende sinen co_uente sullen dat houden In manieren als hier + na bescreuen staet In + den eersten so zel die huur die op + den voirs_ lande staet meerren noch minren op den huurluden mer dat lant erflic besitten om alsulker huur als + er op staet ende die huur van + den ghelde sel + men betalen te drien tiden van + den Jaer te meye een derdendeel te sinte iacobs misse een derdendeel ende te alreheyleghen misse een derdendeel ende die ganse ende hoenre die oec op tvroenlant voirs_ staen sel + men betalen toet alsulken daghen als men + se pleecht te betalen ende waert dat yement dese huur niet en gaue op alsulke daghe als voirs_ siin so soude tsabts ende des co_uents voirs_ meyer moghen wt~panden kies~pande de helfte beter ende die pande sullen verstaen wesen tsanderen daghes na der sonnen onderganc . voert wanneer datter yement sturue van den luden die dat voirs_ lant In huur hebben so zellen haer erfnaem houden dat lant In + die zelve huur daert te~voren In stoet sonder meer also verre als si den abt ende sinen co_uente voirs_ gheuen te voirhuur also veel als die halve huur groet is van enen Iaer ende dat lant en sel niement hebben noch winnen hi en si buurman te limmen of te oesdoem ende nouwer anders ende gheuielt also verre dat lude twisten om dit huurlant so soude die meyer voirs_ huurlieden daer ombieden ende die die huurlieden seyden met waren woerden dat onrecht heeft die verbuert twie scellinghe den abt ende den co_uente te gheuen voert waer dat sake dat enich van + den voirs_ huurluden sturue ende erfnaem hadden bute_ limmen ende bute_ oesdoem wonende also veel als dien dan bestoruen waer die bute_ limmen ende oesdoem woenden dat soude dabt met sinen co_uente voirs_ vrilic nemen ende hoer wille daer mede doen ende waer dat sake dat enich van + den huurluden voirs_ voer metter woen buten limmen ende buten oesdoem so mach dabt ende sin co_uente voirs_ haren wille doen met dien lande . voert waer dat sake dat enich van + den huurluden siin vroenlant vercopen woude so soude hi dat moghen doen bi tsmeyers hant voirs_ om den vierden penninc so verre als hi den meyer daer of een weet dede binnen vier weken daer na dat die coep ghesciet waer ende and_s en mach niement vercopen noch vervreemden dit voirs_ lant in enicherhande manieren sonder verbuernesse des lants ende waer dat . sake dat yement van + den voirs_ huurluden wittachtich hilic dede ende dat hilic buten den voirs_ t_minen van limmen ende van oesdoem eerst beslapen woude dat souden si moghen doen sonder verbuernes hoers vroenlants so verre als si binnen achte daghen binnen limmen of binnen oesdoem quamen mitter woen ende waert dat si niet binnen achte daghen binnen den voirs_ t_minen van limmen ende van oesdoem metter woen en quamen of dat si hoer trouwe in een ander kerke deden dan te limmen of te heyloe so waer hoer vroenlant vrilic an + den abt ende sinen co_uente voirs_ ghecomen ende verbuert voert waer dat sake datter wittachtich hilic ghesciede twischen man en_ wiif ende die een vroenlant hadde ende dander en gheen so soude dat vroenlant menghen gheliken horen eygheliken goede ende om~dat wi zelue gheen ghemien zeghel en hebben so hebbe wi ghebeden heren dirc van valkenburch onsen prochipaep van limmen heren garbrant , roelofs zoen onsen vice~cureyt van heyloe heynric van houte scoute van limmen ende van oesdoem Ian van scoerl ende piilgriim aernts wilden zoen manne tsgoedshuus van egmonde dat si desen brief om onsen wille bezeghelen willen ende wi dirc ende garbrant priesteren heynric Jan ende piilgriim voirs_ hebben om bede willen deser voirs_ huurluden ende om~dat wi hier ouer ende bi gheweest hebben daer alle dese voirs_ zaken ghesciet siin so hebben wi Jn kennesse der waerheyt desen brief bezeghelt mit onsen zeghelen Jnt Jaer ons heren dusent drie + hondert een ende tachtich op des heylichs cruus dach eyaltaco_