Corpus Van Reenen-Mulder (CRM14): Oorkonde E579r33201

Wi dirch aechten sone Scoute in die Wijc / jan gherburghe sone . claes auen sone Ghered die smit / ende vrederic die scoemakere . Scepene in die~selue stede maken Cund ende kenlike allen luden / dat vor ons ende vor onse bure alse vor Dirc bertholomeus sone Claes symons sone ende vor anders vele goeder knapen van onsen buren vter Wijc / quamen cliene claes ghereds sone . Ende dirc sinen broeder / Ende belieden dat si omme ene summe van goede quite scouden eweliken . si ende haer na~comelinghe alle ervenesse ende alle goed dat hem imm_ meer ane~comen sel iof mach van Symon arnouds sones goede haers omes na symons doot vorseyd jn hoghen ende in laghen niet vitghenomen / ende dat nimmer ane te kalengieren / Ende vord so quam vor ons Symon arnouds sone vorscreuen / Ende belyede dien godshuse van Egmonde dat et is sine recht erfname ende wesen sel van al sinen goede niet vitghenom_ dat hi rumet metter doot sonder alle arghelist / Ende omme~dat wi scoute Scepene ende bure hier ouer waren dat dit ghesciede als hier vor~screuen staet So hebbe wi dese lettere beseghelt / met des miens lands Zeghel van der wijc / jnt iaer ons hieren dertien honderd tuie ende dertich / des zaters~daghes na onser vrouwen ghebornesse